Long hap is bilong Raunwara Galili, Jisas i wokim mirakel na givim kaikai long planti tausen manmeri, na bihain ol i laik mekim em i kamap king, olsem na em i ranawe. Long dispela nait Jisas i wokabaut antap long raunwara em bikpela win i sakim, na Pita i bihainim em, tasol bilip bilong em i no strong, olsem na em i laik sink na Jisas i helpim em. Na tu, Jisas i mekim i dai win, ating em i laik helpim ol disaipel bilong em na bai ol i no kisim hevi taim bot i bagarap.

Nau Jisas i go bek long hap wes bilong Raunwara Galili, em long Kaperneam. Ol manmeri Jisas i bin givim kaikai long ol i bungim em na ol i tok: “Wanem taim yu kam long hia?” Jisas i krosim ol na em i tok ol i painim em, long wanem, ol i laik bai em i givim sampela kaikai moa long ol. Em i tok: “Yupela i no ken wok bilong kisim kaikai i save bagarap, nogat. Yupela i mas wok bilong kisim kaikai i no save bagarap na i save givim laip oltaim.” Olsem na ol i tok: “Mipela i mas mekim wanem bilong mekim ol samting God i laikim?”—Jon 6:25-28.

Ating ol i tingim ol samting Lo i kamapim, tasol Jisas i kolim wanpela bikpela samting ol i mas mekim, em i tok: “God i laik yupela i mas mekim olsem, yupela i mas bilip long dispela man em God i salim i kam.” Maski Jisas i bin wokim planti mirakel, ol manmeri i no bilip long em. Ol i askim Jisas long wokim wanpela mirakel na bai ol i ken bilip long em. Ol i tok: “Bai yu mekim wanem samting? Ol tumbuna bilong mipela i bin kaikai mana long ples nating, olsem Rait Holi i kamapim, ‘Em i givim bret long ol i kam long heven na ol i kaikai.’”—Jon 6:29-31; Song 78:24.

Ol i laik lukim wanpela mak, olsem na Jisas i kamapim klia Man husat i kamapim ol dispela mak. Em i tok: “Mi tokim yupela, Moses i no bin givim yupela bret i kam long heven, nogat, tasol Papa bilong mi i givim yupela bret tru i kam long heven. Bret God i givim, em i dispela man husat i lusim heven na kam na givim laip long ol manmeri bilong graun.” Ol i no kliagut long tok bilong em, olsem na ol i tok: “Bikpela, oltaim yu mas givim dispela bret long mipela.” (Jon 6:32-34) Tok bilong Jisas long “bret” i makim wanem samting?

Em i tok: “Mi bret bilong laip. Man i kam long mi bai i no hangre moa, na man i bilip long mi, nek bilong em bai i no drai moa. Mi bin tokim yupela, yupela i lukim mi pinis tasol yupela i no bilip. . . . Mi lusim heven na kam daun bilong bihainim laik bilong man i salim mi i kam na i no bilong bihainim laik bilong mi yet. Laik bilong man i salim mi i kam i olsem, i no gat wanpela bilong ol man em i bin givim long mi i ken lus, nogat. Mi mas kirapim bek ol long las de. Laik bilong Papa bilong mi i olsem, man i luksave long Pikinini na bilip long em, dispela man i mas kisim laip oltaim.”—Jon 6:35-40.

Tok bilong Jisas i mekim na ol Juda i bel nogut na toktok planti. Bilong wanem em i tok em i “dispela bret i bin lusim heven na kam daun”? (Jon 6:41) Ol i tingim Jisas olsem pikinini bilong wanpela man na meri long Galili, em taun bilong Nasaret. Ol i tok: “Dispela man em Jisas pikinini bilong Josep, a? Na yumi save long papa na mama bilong en.”—Jon 6:42.

Jisas i tokim ol: “Yupela i mas lusim pasin bilong toktok planti namel long yupela yet. I no gat man inap kam long mi sapos Papa, husat i bin salim mi i kam, i no kirapim em long kam long mi. Na mi bai kirapim em bek long las de. Rait bilong ol Profet i tok, ‘Na Jehova bai skulim ol.’ Olgeta man i harim pinis tok bilong Papa na kisim save long em, ol i save kam long mi. I no gat wanpela man i bin lukim Papa, dispela man i kam long God, em tasol i bin lukim Papa. Tru tumas mi tokim yupela, Man i bilip, em i gat laip i stap oltaim.”—Jon 6:43-47; Aisaia 54:13.

Sampela de i go pinis Jisas i bin toktok wantaim Nikodemus. Em i bin stori long laip oltaim  na pasin bilong bilip long Pikinini bilong man, na em i tok: “Olgeta man husat i bilip long [Pikinini tru bilong God] ol inap abrusim bagarap na kisim laip oltaim.” (Jon 3:15, 16) Em i tokim bikpela lain manmeri olsem, em i gat wok bilong helpim ol long kisim laip oltaim, na dispela i winim mana o bret ol i kisim long Galili. Olsem na ol i mas mekim wanem bilong kisim laip oltaim? Jisas i kolim gen dispela tok: “Mi bret bilong laip.”—Jon 6:48.

Jisas i stori yet long ol long bret bilong heven, na taim em i skulim ol manmeri long sinagog long Kaperneam, em i kamapim klia insait bilong dispela tok.