Ol Juda long hap not wes bilong raunwara Galili i harim olsem Jisas i lusim Dekapolis bilong i kam long Kaperneam. Ating planti i harim olsem i no longtaim i go pinis Jisas i tok strong na bikpela win na raunwara i stap isi, na sampela i harim olsem em i bin rausim spirit nogut long tupela man. Olsem na “bikpela lain manmeri” i kam bung long nambis bilong Kaperneam long welkamim Jisas. (Mak 5:21) Ol manmeri i amamas tru taim ol i lukim em i lusim bot na wokabaut i kam.

Wanpela bilong ol man i laik lukim Jisas em Jairus, em i hetman bilong sinagog. Em i pundaun klostu long lek bilong Jisas na planti taim em i askim olsem: “Liklik pikinini meri bilong mi i laik dai. Plis kam na putim han bilong yu long em na bai em i ken kamap orait na stap laip.” (Mak 5:23) Jairus i askim Jisas long helpim pikinini meri bilong en husat i gat 12-pela krismas. Em i gat dispela wanpela pikinini meri tasol na em i laikim em tru. Jisas bai mekim wanem bilong helpim em?—Luk 8:42.

Jisas i wokabaut long rot bilong i go long haus bilong Jairus, na bikpela lain manmeri i go wantaim em. Ol i amamas tru, long wanem, ol i ting ol inap lukim Jisas i wokim gen narapela mirakel. Tasol namel long ol, wanpela meri i gat bikpela sik tru i laik bai Jisas i oraitim em.

Inap 12-pela yia, dispela meri Juda i karim blut. Em i bin lukim planti dokta, na em i tromoi olgeta mani bilong em long baim ol marasin. Tasol em i no kisim helpim, sik bilong en “i go bikpela moa.”—Mak 5:26.

Dispela sik i mekim na bodi bilong em i no gat strong, na tu, em i sem na i no laik bung wantaim ol narapela. Sapos meri i gat dispela sik, em i no inap tokim ol narapela long dispela samting. Na tu, Lo Bilong Moses i tok, taim meri i karim blut em i stap doti insait long sampela de. Sapos wanpela man o meri i tatsim em o laplap bilong em i gat blut long en, em i mas i go waswas na em bai i stap doti inap long san i daun.—Wok Pris 15:25-27.

Dispela meri i bin harim “stori bilong Jisas,” na nau em i laik painim em. Em i save em i no klin, olsem na em i wokabaut isi isi namel long bikpela lain manmeri, na em i tokim em yet olsem: “Sapos mi tatsim tasol klos bilong em, bai mi kamap orait.” Taim em i tatsim arere bilong klos bilong Jisas, wantu em i pilim olsem blut bilong em i drai! Na “em i kamap orait na sik i lusim em.”—Mak 5:27-29.

Orait nau Jisas i tok: “Husat i tatsim mi?” Yu ting meri i pilim olsem wanem taim em i harim dispela tok? Na Pita i tokim Jisas: “Ol manmeri i wok long banisim yu na pas pas long yu.” Tasol bilong wanem Jisas i tok: “Husat i tatsim mi?” Jisas i tok moa olsem, “Wanpela i bin tatsim mi, long wanem, mi pilim olsem sampela strong i lusim mi.” (Luk 8:45, 46) Tru tumas sik bilong dispela meri i pinis, olsem na Jisas i pilim olsem sampela strong bilong em i lusim em.

Dispela meri i save olsem em i no inap hait, olsem na em i pret na guria na i kam pundaun klostu long lek bilong Jisas. Long ai bilong olgeta manmeri, em i tokaut long sik bilong em na olsem wanem em i kamap orait. Jisas i pilim tru hevi bilong em na em i tok: “Pikinini, bilip bilong yu i mekim na yu kamap orait. Yu go wantaim bel isi, na dispela sik i no ken givim hevi moa long yu.”—Mak 5:34.

I klia tru olsem, dispela Man God i bin makim bilong bosim dispela graun, em i gat pasin sori, na em i gat strong bilong helpim ol manmeri!