Jisas na ol disaipel bilong em i go kamap long Betsaida. Ol manmeri i kisim wanpela aipas man i kam long Jisas na ol i askim em strong long oraitim em.

Jisas i holim han bilong dispela man na bringim em i go ausait long taun. Na em i spet long ai bilong em na i tok: “Yu lukim wanpela samting?” Dispela man i tok: “Mi lukim ol man. Ol i luk olsem ol diwai, tasol ol i wokabaut.” (Mak 8:23, 24) Jisas i putim han gen long ai bilong dispela man, na em inap lukluk gen. Na Jisas i salim dispela man i go bek long haus bilong em, na i tokim em long no ken i go bek long taun.

Bihain Jisas na ol disaipel bilong em i go long hap not bilong Sisaria Filipai. Ol i mas bihainim rot i go antap long maunten inap olsem 40 kilomita. Dispela ples i stap antap long maunten inap olsem 350 mita long mak bilong solwara, na long hap not is yu inap lukim maunten Hermon em ais i karamapim. Ating ol i mas wokabaut inap sampela de bilong go kamap long dispela ples.

Ol i wokabaut yet na Jisas i lusim ol disaipel, em i go bilong beten. Em i save olsem klostu 9-pela o 10-pela mun i stap yet na ol man bai kilim em i dai, olsem na em i tingim ol disaipel bilong em. Planti bilong ol i bin lusim em, na sampela ol i gat tupela tingting. Ating ol i ting bilong wanem Jisas i no laik bai ol man i makim em long kamap king, na bilong wanem em i no wokim mirakel bilong soim olsem em i husat tru.

Taim ol disaipel i kamap long ples Jisas i beten i stap long en, em i askim ol: “Ol manmeri i wok long tok Pikinini bilong man i husat tru?” Ol disaipel i tok: “Sampela i tok Jon Bilong Baptais, sampela i tok Elaija, na sampela i tok Jeremaia o wanpela bilong ol profet.” Ol manmeri i ting olsem ating Jisas i wanpela bilong ol dispela man husat i kirap bek long dai. Jisas i laik save long tingting bilong ol disaipel bilong em, olsem na em i askim ol: “Tasol yupela yet i tok mi husat?” Kwiktaim Pita i tok: “Yu dispela Krais, Pikinini bilong dispela God i stap laip.”—Matyu 16:13-16.

Jisas i tok Pita i ken amamas, long wanem, God i bin kamapim dispela tok long em. Jisas i tok: “Mi tokim yu: ‘Yu Pita, na long dispela bikpela ston bai mi wokim kongrigesen bilong mi. Na ol geit bilong Matmat bai i no inap daunim dispela kongrigesen bilong mi.’” Tok bilong Jisas i makim olsem em yet i kamapim kongrigesen na ol lain husat i stap gut long God, dai i no gat strong bilong daunim ol. Em i tok promis long Pita olsem: “Mi bai givim ol ki bilong Kingdom bilong heven long yu.”—Matyu 16:18, 19.

Jisas i no tok Pita bai stap nambawan long ol narapela aposel, na makim Pita long i stap olsem as bilong kongrigesen, nogat. Jisas yet i stap olsem as Ston bilong kongrigesen. (1 Korin 3:11; Efesus 2:20) Pita bai kisim 3-pela ki. Em bai mekim gutpela wok tru long helpim sampela lain bambai ol inap i go insait long Kingdom bilong heven.

Pita i mekim wok long namba 1 ki long Pentikos 33 C.E., em i helpim ol Juda na ol man i bihainim lotu Juda em ol i bin tanim bel long save long samting  ol i mas mekim na bai God i ken kisim bek ol. Bihain em i mekim wok long namba 2 ki bilong opim rot long ol Samaria husat i bilip i ken i go insait long Kingdom Bilong God. Na long yia 36 C.E., Pita i mekim wok long namba 3 ki bilong opim rot long ol manmeri bilong ol arapela lain tu long i go insait long Kingdom Bilong God, olsem Kornilius na ol narapela.—Aposel 2:37, 38; 8:14-17; 10:44-48.

Long dispela taim, ol aposel bilong Jisas i bel hevi taim em i tokim ol olsem klostu nau em bai karim pen na hevi na ol man bai kilim em i dai long Jerusalem. Pita i no kliagut olsem Jisas bai kirap bek na kisim laip long heven, olsem na em i kisim Jisas i go long sait na tok strong long em olsem: “Bikpela, marimari long yu yet, dispela samting i no ken kamap long yu.” Tasol Jisas i givim baksait long Pita na i tok: “Yu go baksait long mi! Yu laik pasim rot bilong mi. Tingting bilong yu i no wankain olsem tingting bilong God, nogat, tingting bilong yu i wankain olsem tingting bilong ol man.”—Matyu 16:22, 23.

Jisas i singautim ol manmeri na ol aposel na em i kamapim klia long ol olsem ol man i laik stap disaipel bilong em, ol bai karim hevi. Em i tok: “Sapos wanpela man i laik bihainim mi, orait em i mas givim baksait long ol laik bilong em yet na karim diwai pos bilong en na bihainim mi oltaim. Long wanem, sapos man i laik holimpas laip bilong em yet, orait laip bilong en bai lus. Tasol sapos man i tingim mi na gutnius na i lusim laip bilong en, orait bai em i kisim bek laip bilong em yet.”—Mak 8:34, 35.

Tok bilong Jisas i makim olsem bilong stap gut long em olsem disaipel bilong em, ol i mas strongim bel na daunim sampela laik bilong ol. Jisas i tok: “Sapos man i sem long mi na ol tok bilong mi nau long dispela taim we ol manmeri i no stap gut long God na i mekim ol sin, orait taim Pikinini bilong man i kam long glori bilong Papa bilong en wantaim ol ensel holi, em bai sem long dispela man.” (Mak 8:38) Tru tumas taim Jisas i kam, “bai em i bekim pe long olgeta wan wan inap long pasin ol i bin mekim.”—Matyu 16:27.