Inap sampela taim nau Jisas i mekim wok long Galili, long wanem, planti man i laik harim tok bilong em winim long Judia. Taim em i stap long Jerusalem, em i oraitim wanpela man long de Sabat, olsem na “ol Juda i strong moa long painim rot long kilim em i dai.”—Jon 5:18; 7:1.

Nau em mun Septemba o Oktoba samting long 32 C.E., na Bikpela De Bilong Ol Haus Lotu Sel o Haus Win i laik kamap. Ol i save selebretim dispela bung inap 7-pela de na bihain ol i save mekim bikpela bung bilong lotu long namba 8 de. Ol i mekim dispela bung bilong makim pinis bilong taim bilong wok gaden long wanpela yia, na em i taim bilong tok tenkyu na bikpela amamas tru.

Ol brata bilong Jisas, em Jems, Saimon, Josep, na Judas i tokim em: “Lusim dispela ples na go long Judia.” Taun Jerusalem em ples we planti man i save go long en bilong mekim lotu. Long olgeta yia, ol man i save mekim 3-pela bikpela bung bilong lotu, na planti manmeri i save pulap long taun. Olsem na ol brata bilong Jisas i tokim em: “Man husat i laik bai ol man i save long em, em i no save mekim wanpela samting long ples hait. Yu save mekim ol dispela samting, olsem na kamapim yu yet long ol manmeri.”—Jon 7:3, 4.

Tru tru, fopela brata bilong Jisas “i no bilip” olsem em i dispela Mesaia. Maski i olsem, ol i laik bai ol manmeri i kam long dispela bung i lukim em i mekim ol strongpela wok. Jisas i luksave long hevi inap kamap, olsem na em i tokim ol: “I no gat as long ol manmeri i heitim yupela. Tasol ol i heitim mi, long wanem, mi tokaut long ol olsem ol samting ol i mekim i nogut. Yupela go long dispela bung. Nau yet bai mi no inap go, long wanem, taim bilong mi i no yet.”—Jon 7:5-8.

Ol brata bilong Jisas i wokabaut i go wantaim bikpela lain, na sampela de bihain Jisas wantaim ol disaipel bilong em i hait na i go. Ol i no wokabaut bihainim rot em planti man i save bihainim klostu long wara Jordan, nogat, ol i bihainim rot i go stret long Samaria. Jisas na ol disaipel bai nidim wanpela ples slip long Samaria, olsem na em i salim sampela man i go pas bilong redim ol samting. Long wanpela ples, ol manmeri i no laik welkamim ol o mekim gut long ol, long wanem, Jisas i laik go long Jerusalem long bikpela bung bilong ol Juda. Olsem na Jems na Jon i belhat na ol i askim Jisas olsem: “Bikpela, yu laik bai mipela i tokim paia long kam daun long skai na pinisim ol?” (Luk 9:54) Jisas i krosim ol long mekim kain tok olsem, na ol i wokabaut yet i go.

Taim ol i wokabaut long rot i go, wanpela saveman bilong Lo i tokim Jisas olsem: “Tisa, mi bai bihainim yu long wanem wanem hap yu go long en.” Na Jisas i tokim em: “Ol foks i gat hul long graun na ol pisin i gat hap bilong slip, tasol Pikinini bilong man i no gat ples bilong slip.” (Matyu 8:19, 20) Jisas i kamapim  klia long dispela saveman olsem man i kamap disaipel bilong em bai i no gat planti samting. I luk olsem dispela man i gat pasin antap, na em i no laik tru long bihainim Jisas. Olsem na yumi wan wan i ken askim yumi yet, ‘Mi gat laik tru long bihainim Jisas?’

Jisas i tokim narapela man: “Kam bihainim mi.” Na dispela man i tok: “Larim mi i go pastaim na planim papa bilong mi.” Jisas i save long sindaun bilong dispela man, olsem na em i tok: “Larim ol daiman i planim ol daiman bilong ol, na yu go na tokaut long Kingdom bilong God long olgeta hap.” (Luk 9:59, 60) Papa bilong dispela man i no dai yet. Sapos papa bilong em i dai pinis, em i no inap stap long dispela hap na toktok long Jisas. I klia tru olsem dispela man i no redi long putim Kingdom Bilong God i stap nambawan samting long laip bilong em.

Ol i wokabaut i go daun klostu long Jerusalem, na narapela man i tokim Jisas: “Bikpela, mi bai bihainim yu. Tasol pastaim larim mi tok gutbai long ol wanhaus bilong mi.” Na Jisas i bekim tok: “Man i putim han long tul bilong brukim graun na lukluk i go long ol samting i stap baksait, dispela man i no fit long i go insait long Kingdom bilong God.”—Luk 9:61, 62.

Ol man i laik kamap disaipel tru bilong Jisas i mas putim tingting bilong ol i go stret long wok bilong Kingdom. Sapos man bilong brukim graun i no lukluk i go stret, ating baret em i digim bai krungut. Sapos em i putim tul bilong brukim graun i go daun bambai em inap lukim ol samting long baksait, orait wok bilong em i no inap pinis. Olsem tasol, man i lukluk i go long baksait long ol samting bilong dispela graun, em bai lusim rot i go long laip i stap oltaim.