Taim Jisas i save olsem ol Farisi na lain politik bilong Herot i pasim tok long kilim em i dai, em na ol disaipel i lusim dispela hap na ol i go long raunwara Galili. Bikpela lain manmeri long olgeta hap i kam long em, ol i bilong Galili, Jerusalem, hap is bilong wara Jordan, hap saut bilong Idumea, na ol taun i stap arere long nambis bilong Tair na Saidon. Jisas i oraitim planti sikman. Olsem na ol manmeri i gat sik i pas pas raunim Jisas na ol i laik tatsim em, na ol i no wetim em long tatsim ol.—Mak 3:9, 10.

Jisas i lukim bikpela lain manmeri tru i kam, olsem na em i tokim ol disaipel long redim wanpela liklik bot bambai em i kalap long en na pul i go longwe long nambis na ol manmeri i no ken pas pas long em. Long dispela rot, em inap skulim ol long taim em i stap long bot, o em i ken pul i go long narapela ples arere long nambis bilong skulim planti manmeri moa.

Disaipel Matyu i stori long ol wok Jisas i mekim, na em i tok dispela i “truim tok bilong profet Aisaia.” (Matyu 12:17) Jisas i truim wanem tok profet?

“Harim! Wokman bilong mi, em man mi bin makim. Mi laikim em tumas na bel bilong mi i amamas long em! Mi bai putim spirit bilong mi long em. Na long olgeta lain man em bai kamapim klia stretpela pasin i wanem samting. Bai em i no tok pait, o singaut bikmaus. Na i no gat wanpela bai harim nek bilong en long ol bikrot. Bai em i no krungutim pitpit i bruk liklik, na bai em i no kilim i dai lam em paia long wik bilong en i laik pinis. Bai em i stap olsem inap long em i mekim stretpela pasin i win. Tru tumas, long nem bilong em, olgeta lain man i ken wetim gutpela samting i kamap.”—Matyu 12:18-21; Aisaia 42:1-4.

Tru tumas, Jisas em dispela wokman God i orait long en. Jisas i skulim ol man long stretpela pasin em i wanem samting, tasol ol lotu giaman i no tokaut long dispela. Ol Farisi i gat tingting kranki long Lo Bilong God, olsem na long de Sabat ol i no save helpim ol man i gat sik! Bilong kamapim klia stretpela pasin bilong God na soim olsem spirit bilong God i stap long em, Jisas i helpim ol man long lusim ol pasin na tingting i no stret em ol hetman bilong lotu i bin kamapim. Olsem na ol hetman bilong lotu i laik kilim em i dai. Dispela em i pasin nogut tru!

Wanem mining bilong dispela tok, “bai em i no tok pait, o singaut bikmaus, na i no gat wanpela bai harim nek bilong en long ol bikrot”? Taim Jisas i oraitim ol sikman, em i no laik bai ol dispela  man na ol spirit nogut i “tokaut long em i husat tru.” (Mak 3:12) Jisas i no laik bai ol man i singaut long ol bikrot na tokaut long ol wok em i mekim, o ol man i bung na toktok namel long ol yet, long wanem, dispela inap mekim na stori i paul.

Na tu, Jisas i givim gutpela tok bilong mekim isi bel bilong ol man i krai sori, ol i kain olsem pitpit i no gat strong na i bruk liklik, na olsem lam em paia long wik bilong en i laik pinis. Jisas i no krungutim pitpit i laik bruk o kilim i dai lam olgeta, nogat. Em i gat pasin isi na pasin laikim, olsem na em i strongim ol man i gat pasin daun. Tru tumas, Jisas em dispela man em olgeta manmeri long graun inap bilip na wet long em!