Jisas i mekim bikpela wok moa long skulim ol manmeri long Galili, long wanem, klostu nau Pasova bilong yia 32 C.E. bai kamap. Bihain, ating em i go long Jerusalem bilong tingim Pasova olsem Lo Bilong God i makim. Tasol Jisas i was gut, long wanem, ol Juda i painim rot bilong kilim em i dai. (Jon 7:1) Bihain em i go bek long Galili.

Ating Jisas i stap long Kaperneam taim ol Farisi na ol saveman bilong lo i lusim Jerusalem na i kam long em. Bilong wanem ol i kam? Ol i laik painim wanpela rong long Jisas, olsem em i no bihainim ol lo bilong lotu, na bai ol i ken kotim em. Ol i askim em: “Bilong wanem ol disaipel bilong yu i kalapim kastam em ol man bilong bipo i save bihainim? Ol i no save wasim han bilong ol paslain long ol i kaikai.” (Matyu 15:2) God i no tokim lain bilong em long bihainim pasin bilong “wasim han i go antap inap long elbo.” (Mak 7:3) Tasol lo bilong ol Farisi i tok, sapos man i no wasim han i go inap long elbo, em i mekim bikpela rong.

Jisas i no bekim stret askim bilong ol Farisi, nogat. Em i mekim ol tok bilong soim olsem long laik bilong ol yet, ol i brukim Lo Bilong God. Em i tok: “Bilong wanem yupela i kalapim lo bilong God na bihainim kastam bilong yupela? God i tok, ‘Onarim papa bilong yu na mama bilong yu,’ na, ‘Man i tok nogut long papa o mama em i mas i dai.’ Tasol yupela i save tok, ‘Sapos man i tokim papa o mama bilong en: “Ol samting bilong mi em yu inap kisim helpim long en, em presen mi dediketim long God,” orait dispela man i no gat wok long onarim papa bilong en.’”—Matyu 15:3-6; Kisim Bek 20:12; 21:17.

Ol Farisi i kamapim wanpela lo olsem samting man i makim bilong givim olsem presen long God, olsem mani na graun, em samting bilong tempel, na man i no ken yusim bilong mekim ol narapela wok. Tasol tru tru, dispela presen em i laik givim i no bilong tempel, nogat, em bilong em yet. Ating wanpela man bai tok mani o graun bilong em, em “korban,” em presen em i dediketim long God o long tempel. I olsem em i tok mani na graun bilong en em samting em i mas givim long tempel. Em i gat rait long yusim ol dispela samting bilong lukautim papamama bilong em husat i lapun pinis na ol i sot long ol samting. Tasol em i no mekim wok bilong em long lukautim papamama.—Mak 7:11.

I stret Jisas i kros long ol Farisi i no bihainim Lo Bilong God, em i tok: “Long rot bilong ol kastam bilong yupela, yupela i mekim olsem tok bilong God i samting nating. Yupela i man bilong tupela maus. Aisaia i makim yupela stret taim em i tok profet olsem: ‘Ol dispela manmeri i save onarim mi long maus, tasol bel bilong ol i stap longwe long mi. Ol i lotu nating long mi, long wanem, ol samting ol i skulim ol man long en em tok bilong ol man tasol.’” Ol Farisi i no inap bekim tok bilong Jisas. Olsem na em i singautim ol manmeri long kam klostu, na em i tok: “Putim yau na kisimgut mining bilong dispela tok. Samting i go insait long maus bilong man i no save mekim man i kamap doti, nogat, tasol samting i save kamaut long maus, dispela i mekim man i kamap doti.”—Matyu 15:6-11; Aisaia 29:13.

Bihain taim ol i stap long haus, ol disaipel i askim Jisas: “Yu save olsem tok bilong yu i bagarapim bel bilong ol Farisi?” Jisas i bekim tok olsem: “Olgeta diwai Papa bilong mi long heven i no bin planim long gaden, em bai kamautim. Larim ol. Ol i aipas na ol i laik soim rot. Olsem na sapos wanpela aipas i soim rot long narapela aipas, orait tupela wantaim bai pundaun long hul.”—Matyu 15:12-14.

Jisas i kirap nogut taim Pita i makim maus bilong ol disaipel na askim em long stori gut long samting i mekim man i kamap doti. Jisas i tok: “Ating yupela i no save olsem olgeta samting i go insait long maus i save go long bel rop na kamaut i go long toilet, a? Tasol ol samting i kamaut long maus i save kam long tingting bilong bel, na ol dispela samting i save mekim man i kamap doti. Olsem, ol samting i kam long tingting bilong bel em ol tingting nogut, pasin bilong kilim man i dai, pasin adaltri, pasin pamuk,  stil, giaman, na tok nogut. Ol dispela samting i save mekim man i kamap doti. Tasol pasin bilong i no wasim han pastaim na kaikai, dispela i no mekim man i kamap doti.”—Matyu 15:17-20.

Tok bilong Jisas i no makim olsem yumi no ken wasim han taim yumi redim kaikai o taim yumi kaikai, nogat. Em i laik kamapim pasin giaman bilong ol hetman bilong lotu, ol i strong long bihainim ol kastam bilong ol man na ol i sakim ol stretpela lo bilong God. Tru tumas, tingting nogut long bel bilong man i kirapim em long mekim ol pasin nogut, na dispela i mekim em i kamap doti.