Jisas i bin skulim na oraitim ol manmeri long Judia na long Jerusalem. Na bihain em i go long hapsait bilong wara Jordan na skulim ol manmeri long ol taun long distrik bilong Perea. Tasol klostu nau em bai kam bek long Jerusalem.

Taim Jisas i stap long Perea, wanpela man i askim em: “Bikpela, i tru God bai kisim bek wan wan man tasol?” Ating dispela man i mas save olsem ol bikman bilong lotu i tok pait namel long ol yet olsem God bai kisim bek planti manmeri o sampela tasol. Jisas i no stori long hamas man God bai kisim bek, nogat, em i stori long samting man i mas mekim na bai God i kisim em bek. Em i tok: “Yupela i mas taitim bun tru long i go insait long liklik dua.” Yes, man i mas wok strong na taitim bun. Tasol bilong wanem em i mas mekim olsem? Jisas i tok: “Mi tokim yupela, planti bai traim long i go insait, tasol ol bai i no inap.”—Luk 13:23, 24.

Jisas i mekim wanpela tok piksa bilong soim olsem man i mas taitim bun, em i tok: “Taim papa bilong haus i kirap na lokim dua, na yupela i kam sanap ausait na paitim dua na tok, ‘Bikpela, opim dua long mipela.’ . . . Em bai tokim yupela, ‘Mi no save yupela i bilong wanem hap. Yupela ol man bilong mekim pasin i no stret, yupela klia long mi!’”—Luk 13:25-27.

Dispela i kamapim klia hevi em man i kam leit inap bungim, i luk olsem em i kam kamap long taim em yet i laik kam long en, na em i lukim olsem dua i pas na i lok pinis. Mobeta em i kam long taim stret, maski dispela i givim hatwok long em. Olsem tasol, taim Jisas i stap yet na skulim ol man long dispela hap, planti manmeri inap kisim helpim. Rot i op long ol i putim lotu i tru i stap nambawan samting long laip bilong ol, tasol ol i no bin mekim olsem. God i bin salim Jisas i go long ol dispela lain manmeri, tasol planti bilong ol i no bilip long rot God i makim bilong kisim bek ol. Jisas i tok ol bai “krai na sikirapim tit” taim ol i tromoi ol i go ausait. Maski i olsem, ol manmeri bilong “hap is na wes na not na saut,” yes, bilong olgeta kantri, “bai sindaun long tebol long Kingdom bilong God.”—Luk 13:28, 29.

Jisas i tok moa: “Lain i stap las [olsem ol man i no bilong lain Juda, na sampela Juda em ol bikman bilong lotu i daunim ol] ol bai stap fes, na lain i stap fes [olsem ol bikman bilong lotu husat i save hambak olsem ol i tumbuna pikinini bilong Abraham] ol bai stap las.” (Luk 13:30) Ol dispela lain i stap “las,” long wanem, ol i no tenkyu long God long ol gutpela samting em i givim long ol, olsem na ol i no inap insait long Kingdom Bilong God.

Orait nau sampela Farisi i kam na tokim Jisas olsem: “Lusim dispela hap na go, long wanem, Herot [Antipas] i laik kilim yu i dai.” Ating King Herot yet i bin kirapim dispela tok win bambai Jisas i pret na lusim dispela hap. I luk olsem Herot i pret, bikos bipo em i bin insait long i dai bilong Jon Bilong Baptais, na nogut ol i kilim i dai narapela profet na sutim tok long em. Tasol Jisas i tokim ol Farisi: “Go na tokim dispela foks, ‘Harim! Mi wok long rausim ol spirit nogut na oraitim ol sikman long tude na long tumora,  na long namba 3 de mi bai pinisim wok bilong mi.’” (Luk 13:31, 32; futnot) Ating Jisas i kolim Herot olsem “foks” bikos em i tingim pasin bilong ol foks, ol i kleva na i gat pasin trik. Tasol Jisas i no inap larim Herot o ol narapela man long hariapim em o fosim em long mekim samting, nogat. Em bai mekim wok Papa i givim long em, em bai mekim insait long haptaim God i makim, na i no long taim man i makim.

Bihain Jisas i go long Jerusalem, long wanem, em i tok, “i no stret long ol i kilim i dai wanpela profet ausait long Jerusalem.” (Luk 13:33) I no gat wanpela tok profet bilong Baibel i kamapim olsem Mesaia bai dai long dispela taun. Tasol wai na Jisas i tok ol bai kilim em i dai long dispela hap? Long wanem, Jerusalem em i nambawan biktaun na em hap we Sanhedrin na 71 memba bilong dispela suprim kot i stap long en. Na ol i save harim kot bilong ol man em ol narapela i sutim tok long ol olsem ol i giaman profet. Na tu, ol i save sakrifaisim ol animal long dispela hap. Olsem na Jisas i save olsem ol i mas kilim em long Jerusalem, na ol i no ken kilim em i dai long narapela hap.

Jisas i krai na tok: “Jerusalem, Jerusalem, yu taun bilong kilim ol profet i dai na stonim ol man God i salim i kam long yu! Planti taim tru mi bin i gat laik long bungim ol pikinini bilong yu wankain olsem mama kakaruk i save bungim ol pikinini bilong en aninit long wing bilong en, tasol yupela i no laik. Harim! Nau dispela haus i stap long han bilong yupela.” (Luk 13:34, 35) Lain Juda i sakim Pikinini Bilong God, olsem na bagarap i mas painim ol!

Paslain long Jisas i go kamap long Jerusalem, wanpela hetman bilong ol Farisi i invaitim Jisas long i go kaikai long haus bilong em long de Sabat. Wanpela man i stap, na em i gat sik we skin i save solap (olsem wara i save pulap long lek samting). Ol man i stap long dispela kaikai i putim ai long Jisas, ol i laik save em bai mekim wanem long dispela man. So Jisas i askim ol Farisi na ol saveman bilong Lo olsem: “Olsem wanem? I tambu long oraitim ol sikman long Sabat o nogat?”—Luk 14:3.

I no gat wanpela man i bekim tok. So Jisas i oraitim dispela man na nau em i askim ol: “Sapos pikinini man o bulmakau bilong yupela i pundaun i go insait long hulwara long de Sabat, husat bilong yupela bai i no pulim em i kam antap kwiktaim?” (Luk 14:5) Ol i no inap bekim gen dispela askim.