Bihain long Jisas i bungim Marta na Maria klostu long Betani, ol i go long matmat bilong Lasarus. Ol i wokim matmat bilong em long hul bilong ston, na ol i pasim maus bilong en long wanpela bikpela ston. Olsem na Jisas i tok: “Rausim ston i go.” Marta i no save long samting Jisas i laik mekim, na em i tok: “Bikpela, nau em namba 4 de, na bodi bai smel.” Tasol Jisas i tokim em: “Mi bin tokim yu pinis olsem sapos yu bilip, yu bai lukim glori bilong God.”—Jon 11:38-54.

Olsem na ol i rausim ston. Nau Jisas i lukluk i go antap na i beten: “Papa, mi tenkyu long yu bin harim tok bilong mi. Mi save olsem oltaim yu save harim tok bilong mi. Tasol mi tingim ol manmeri i sanap i stap na mi mekim dispela tok, bilong ol i ken bilip olsem yu bin salim mi i kam.” Jisas i  beten long ai bilong ol manmeri bambai ol i ken save olsem samting nau em i laik mekim, em bai mekim long strong bilong God. Nau em i singaut strong: “Lasarus, yu kam ausait!” Na dispela samting i kamap. Lasarus i kirap bek na i kam ausait. Laplap ol i bin pasim long lek na han na pes bilong em i stap yet long skin bilong em. Jisas i tokim ol: “Rausim ol laplap na larim em i go.”—Jon 11:41-44.

Planti Juda husat i bin kam bilong krai sori wantaim Maria na Marta, ol i lukim dispela mirakel Jisas i wokim na ol i bilip long em. Tasol sampela i go long ol Farisi na tokim ol long samting Jisas i mekim. Kwiktaim ol Farisi wantaim ol bikpris i singautim kaunsil o Sanhedrin, em suprim kot bilong ol Juda. Wanpela bilong ol dispela bikpris em Kaiafas. Ol i bel hevi na i tok: “Dispela man i wokim planti mirakel, bai yumi mekim wanem? Sapos yumi larim em i mekim olsem, olgeta bai bilip long em, na ol Rom bai kam na tekewe tempel bilong yumi na pipol bilong kantri bilong yumi.” (Jon 11:47, 48) Maski ol i harim tok bilong ol aiwitnes olsem Jisas i “wokim planti mirakel,” ol dispela man i no amamas long wok Jisas i mekim long strong bilong God. Ol i tingim tasol bikpela namba na strong ol i holim.

Taim Jisas i kirapim bek Lasarus, dispela samting i daunim tru ol Sadyusi, long wanem, ol i tok ol man i dai pinis i no inap kirap bek. Kaiafas em wanpela Sadyusi, em i tok: “Yupela i no gat save liklik, na yupela i no luksave olsem em i gutpela moa long wanpela man i kisim ples bilong ol manmeri na i dai na lain olgeta i no ken kisim bagarap.”—Jon 11:49, 50; Aposel 5:17; 23:8.

Kaiafas i laik tok ol i mas kilim i dai Jisas bambai em i no ken daunim namba na strong em ol lida bilong lotu Juda i holim bilong bosim ol man. Olsem na Kaiafas i bin tok profet olsem dai bilong Jisas i bilong helpim “ol pikinini bilong God i stap nabaut,” na i no bilong helpim ol Juda. Tasol taim yumi tingim namba Kaiafas i holim, i klia olsem God yet i stiaim em long mekim dispela tok, na em i no kamapim “tingting bilong em yet.”—Jon 11:51, 52.

Kaiafas i kirapim kaunsil na ol i wokim plen bilong kilim i dai Jisas. Nikodemus em pren bilong Jisas na em i insait long kaunsil, olsem na ating em i kam long Jisas na tokim em long dispela plen. Na kwiktaim Jisas i lusim Jerusalem na i go na bai ol i no kilim em i dai inap long taim God i makim.