I luk olsem Jisas i stap yet long Perea long hap is bilong Wara Jordan, na em i mekim tok piksa bilong sipsip i lus na bilong drakma koin i lus. Skul yumi kisim long dispela 2-pela tok piksa em olsem, yumi mas amamas taim wanpela sinman i tanim bel na i kam bek long God. Ol Farisi na ol saveman bilong lo i sutim tok long Jisas i save amamas na bung wantaim ol dispela kain man. Tasol yu ting ol dispela man i lainim sampela samting long 2-pela tok piksa bilong Jisas? Yu ting ol i kliagut long tingting Papa bilong yumi long heven i gat long ol sinman i tanim bel? Orait nau Jisas i mekim wanpela gutpela tok piksa i kamapim klia wankain samting ol inap kisim skul long en.

Dispela tok piksa i stori long wanpela papa i gat tupela pikinini man, tasol tok piksa i stori planti long namba 2 pikinini man. Ol Farisi na ol saveman bilong lo, na tu, ol narapela i harim stori bilong Jisas, ol inap kisim skul long pasin bilong namba 2 pikinini long dispela tok piksa. Tasol yumi mas tingim tu tok Jisas i mekim long papa na namba 1 pikinini man, long wanem, pasin bilong tupela inap givim skul long yumi. So tingim samting dispela 3-pela man wantaim i mekim long tok piksa bilong Jisas.

Jisas i kirapim tok piksa olsem: “Wanpela man i gat tupela pikinini man. Namba 2 pikinini i tokim papa, ‘Papa, givim mi ol samting bilong yu em bihain mi bai kisim.’ Na papa i tilim ol samting bilong en long tupela.” (Luk 15:11, 12) Tingim, namba 2 pikinini i askim long kisim ol samting bilong papa bilong em maski papa i stap laip yet. Em i laik kisim nau ol samting em papa i makim bilong em bambai em i ken stap em yet na mekim ol samting em i laik mekim. Em i laik mekim wanem?

Jisas i stori olsem: “Sampela de bihain namba 2 pikinini i bungim olgeta samting na i go long wanpela longwe ples. Na long dispela hap em i mekim ol kain kain hambak pasin na westim ol samting bilong en.” (Luk 15:13) Papa i laikim na lukautim gut ol pikinini bilong em, tasol dispela pikinini i lusim olgeta dispela samting na i go long narapela hap. Long dispela hap, em i westim olgeta mani samting bilong em long ol kain kain pasin nogut, na inapim laik bilong em long mekim pasin pamuk. Bihain taim nogut i painim em, Jisas i stori moa olsem:

 “Taim em i tromoi pinis olgeta mani bilong en, bikpela hangre i kamap long dispela hap na em i no gat wanpela samting. Olsem na em i go na kisim wok long wanpela man long dispela ples. Na dispela man i salim em i go long hap graun bilong en long lukautim ol pik. Na em i laik tru long pulapim bel bilong en long ol bin bilong diwai karob em ol pik i wok long kaikai, tasol i no gat wanpela man i laik givim wanpela samting long em.”—Luk 15:14-16.

Lo Bilong God i tok olsem pik em samting i no klin, tasol dispela pikinini i lukautim ol pik. Em i hangre tru, na dispela i mekim na em i gat bikpela laik long kisim kaikai bilong ol pik em i lukautim. Taim em i bungim taim nogut na em i sot stret, nau “em i kisim stretpela tingting.” Em i mekim wanem? Em i tok long em yet olsem: “Ol wokman bilong papa bilong mi i gat planti bret, na mi stap hia na bagarap tru long hangre! Mi bai kirap na go long papa bilong mi na tokim em: ‘Papa, mi mekim sin long God na long yu. Mi no gutpela moa inap long yu kolim mi pikinini bilong yu. Larim mi i kamap olsem wanpela wokman bilong yu.’” Orait nau em i kirap na i go long papa bilong em.—Luk 15:17-20.

Papa bilong em bai mekim wanem? Yu ting em bai belhat long pikinini na krosim em long em i bin mekim longlong pasin taim em i lusim haus na i go? Olsem wanem? Papa bai daunim em na soim olsem em i no amamas long lukim em? Sapos yu dispela papa, bai yu mekim wanem? Olsem wanem sapos em i pikinini man o pikinini meri bilong yu?

Jisas i stori long papa i bin pilim olsem wanem na em i bin mekim wanem taim pikinini i kam bek,  olsem: “Taim [pikinini] i stap longwe yet, papa i lukim em na i sori tru long em, na em i ran i go na holimpas em na givim kis long em.” (Luk 15:20) Maski papa i bin harim stori long olkain pasin nogut pikinini i mekim, em i no tingim dispela, em i amamas long pikinini i kam bek. Ol hetman bilong Juda i tok ol i save long Jehova na lotu long em. Tasol long rot bilong dispela stori, yu ting ol inap luksave long Papa bilong yumi long heven i save pilim olsem wanem taim ol sinman i tanim bel? Yu ting ol bai luksave olsem Jisas tu i pilim wankain olsem Papa bilong em?

Papa i lukim pes bilong pikinini i sore na em i bel hevi tru na em i save olsem pikinini i tanim bel. Tasol gutpela pasin bilong papa long kirap pastaim long i go bungim pikinini, dispela i mekim na i no hatwok long pikinini i autim ol sin bilong em. Orait Jisas i tok: “Na pikinini i tokim em, ‘Papa, mi mekim sin long God na long yu. Mi no gutpela moa inap long yu kolim mi pikinini bilong yu.’”—Luk 15:21.

Papa i tokim ol wokboi bilong em: “Hariap! bringim nambawan longpela klos i kam na putim long em, na putim ring long pinga bilong em na sendol long lek bilong em. Na tu, bringim wanpela patpela pikinini bulmakau i kam na kilim na yumi ken kaikai na amamas wantaim, long wanem, dispela pikinini bilong mi i bin i dai na em i kisim laip gen, em i bin lus, tasol yumi painim em pinis. Na ol i kirap na amamas wantaim.”—Luk 15:22-24.

Taim ol i wok long amamas i stap, namba 1 pikinini man i stap long gaden. Jisas i tok: “Taim em i kamap klostu long haus em i harim krai bilong musik na danis. Olsem na em i singautim wanpela wokboi i kam na askim em long wanem samting i kamap. Em i tokim em, ‘Brata bilong yu i kam bek pinis na papa bilong yu i kilim patpela pikinini bulmakau, long wanem, em i kam bek na em i no bin kisim bagarap.’ Tasol dispela namba 1 pikinini i belhat na i no laik i go insait. Na papa bilong en i kam na kirapim em long kam insait. Em i bekim tok long papa olsem, ‘Mi bin mekim wok bilong yu inap planti yia na i no gat wanpela taim mi bin sakim tok bilong yu, tasol i no gat wanpela taim yu bin givim wanpela liklik pikinini meme long mi bilong mi ken  amamas wantaim ol pren bilong mi. Tasol taim dispela pikinini bilong yu husat i bin pinisim ol samting bilong yu long ol pamukmeri, em i kam kamap, yu kilim patpela pikinini bulmakau bilong amamasim em.’”—Luk 15:25-30.

Wanem lain i olsem dispela namba 1 pikinini, em ol i kros long Jisas i marimari na tingim ol man nating na ol sinman? Em ol saveman bilong lo na ol Farisi. Ol i kros long Jisas i bin amamas long bung wantaim ol sinman, na dispela i kirapim Jisas long mekim dispela tok piksa. Tru tumas, man husat i toktok planti long pasin bilong God long marimari long ol sinman, em i mas tingim gut skul yumi kisim long dispela tok piksa.

Bilong pinisim tok piksa, Jisas i stori long gutpela tok papa i mekim long namba 1 pikinini man. Em i tok: “Pikinini, oltaim yu stap wantaim mi, na olgeta samting bilong mi em i bilong yu. Tasol mipela i mas amamas na belgut, long wanem, dispela brata bilong yu i bin i dai na em i kisim laip gen, na em i bin lus na yumi painim em pinis.”—Luk 15:31, 32.

Jisas i no stori long samting namba 1 pikinini i mekim. Tasol bihain long Jisas i dai na kirap bek, “bikpela lain pris tu ol i bilip.” (Aposel 6:7) Ating sampela bilong ol em ol lain husat i harim Jisas i mekim dispela tok piksa bilong pikinini i bin lus. Yes, rot i op tu long ol inap kisim stretpela tingting, tanim bel na kam long God.

Kirap long dispela taim na i kam, ol disaipel bilong Jisas i mas tingim gut long bel bikpela skul em Jisas i kamapim long dispela gutpela tok piksa. Namba 1 skul em olsem, em i savetingting long stap gut insait long lain bilong God, aninit long lukaut bilong Papa bilong yumi, husat i save laikim yumi na givim ol samting long yumi, na yumi no laik go nabaut na painim ol kain kain amamas long “wanpela longwe ples.”

Namba 2 skul i olsem, sapos yumi lusim stretpela rot em God i makim, orait yumi mas daunim yumi yet na kam bek long Papa bilong yumi na em bai orait gen long yumi.

Namba 3 skul yumi inap kisim em long pasin bilong papa na bilong bikpela brata. Papa i mekim gutpela pasin long kisim bek pikinini na em i fogivim rong bilong em. Tasol bikpela brata i kros na i no amamas long bungim liklik brata. Em i klia tru olsem, ol wokman bilong God i mas i gat pasin bilong fogivim man na amamas taim wanpela i bin lusim rot bilong God, em i tanim bel tru na kam bek long ‘haus bilong Papa.’ Yumi mas amamas olsem brata bilong yumi husat ‘i bin i dai, em i kisim laip gen,’ na em “i bin lus na yumi painim em pinis.”