Jisas i oraitim sikman em skin bilong em i solap, na em i stap yet long haus bilong wanpela Farisi. Jisas i lukim ol narapela visita i makim ol nambawan hap bilong sindaun long taim bilong kaikai, olsem na em i yusim dispela bilong skulim ol long pasin daun.

Jisas i tok: “Taim wanpela i singautim yu i go long marit kaikai, no ken sindaun long hap bilong ol man i gat nem. Nogut em i bin singautim wanpela i gat biknem moa winim yu, na dispela man i bin singautim yutupela wantaim, em bai kam na tokim yu, ‘Larim dispela man i sindaun long dispela hap.’ Na yu bai sem na kirap na go sindaun long baksait tru.”—Luk 14:8, 9.

Bihain Jisas i tok: “Taim wanpela i singautim yu, go sindaun long baksait tru, na dispela man i singautim yu, taim em i kam em bai tokim yu, ‘Pren, go sindaun antap liklik.’ Orait long ai bilong ol arapela lain i kam long bung, yu bai kisim biknem.” Taim man i mekim olsem em i no mekim tasol gutpela pasin, nogat. Jisas i tok: “Man i litimapim em yet, em bai kisim sem. Na man i daunim em yet, em bai kisim biknem.” (Luk 14:10, 11) Yes, Jisas i laik bai ol man i putim yau long tok bilong em i kisim pasin daun.

Orait nau Jisas i givim narapela skultok long dispela Farisi husat i bin invaitim em. Jisas i tokim em long pasin em i ken bihainim taim em i wokim wanpela kaikai na bai God i amamas long dispela pasin. Em i tok: “Taim yu wokim kaikai bilong belo o kaikai bilong apinun, no ken singautim ol pren, ol brata, ol wantok, o ol wanples bilong yu em ol i maniman. Nogut bihain ol i singautim yu tu na dispela i bekim bek pasin yu bin mekim long ol. Taim yu wokim wanpela kaikai, singautim ol lain i stap rabis, ol lain i gat bagarap long bodi, ol lek nogut, na ol aipas. Na yu bai amamas, long wanem, ol i no gat samting bilong bekim bek long yu.”—Luk 14:12-14.

Em i nomol long yumi invaitim ol pren, wantok, o neiba long kam kaikai wantaim yumi, i no olsem Jisas i tok dispela pasin i no stret, nogat. Tok bilong em i makim olsem yumi inap kisim planti blesing taim yumi givim kaikai long ol man i sot long samting, olsem lain i stap rabis, ol lain i gat bagarap long bodi, ol lek nogut, na ol aipas. Jisas i tokim dispela Farisi olsem: “Yu bai kisim pe bilong yu long taim ol stretpela man i kirap bek.” Wanpela bilong ol visita i wanbel na i tok: “Man i kaikai bret long Kingdom bilong God, em i ken amamas.” (Luk 14:15) Dispela man i pilim olsem em i gutpela samting tru long stap long dispela bung, tasol i no olgeta i holim kain tingting olsem. Olsem na Jisas i kamapim klia dispela long rot bilong wanpela tok piksa, em i tok:

“Wanpela man i wokim bikpela kaikai na em i singautim planti man. . . . Em i salim wokboi bilong en i go tokim ol man em i bin singautim, ‘Kam, ol samting i redi nau.’ Tasol olgeta wantaim i givim eskius. Namba 1 i tokim em, ‘Mi bin baim wanpela hap graun na mi mas go na lukim. Sori tru, mi no inap kam.’ Na narapela i tok, ‘Mi bin baim 10-pela bulmakau na bai mi go skelim ol. Sori tru, mi no inap kam.’ Na narapela i tok, ‘Nau tasol mi maritim wanpela meri, olsem na mi no inap kam.’”—Luk 14:16-20.

Em i no ol gutpela eskius! Taim man i laik baim wanpela hap graun o lain animal, pastaim em i save skelim na bihain em i baim, olsem na i no gat wok long em i go hariap long lukim ol dispela samting taim em i baim pinis. Namba 3 man i no gat wok long redim ol samting bilong marit, long wanem, em i marit pinis. Olsem na dispela i no ken pasim em long orait long dispela spesel invatesen. Taim bosman i harim ol dispela eskius, em i belhat na tokim wokboi bilong em:

“Go hariap long ol bikrot na ol liklik rot bilong taun, na bringim ol lain i stap rabis na ol lain i gat bagarap long bodi na ol aipas na ol lek nogut.” Wokboi i mekim olsem bosman i tok, tasol i gat sampela spes i stap yet. So bosman i tokim wokboi: “Go long ol rot na bihainim ol banis bilong ol gaden, na yu mas strong long ol manmeri i mas i kam na bai haus bilong mi i pulap. Mi tokim yupela ol manmeri: Ol dispela man mi bin singautim ol, i no gat wanpela  bilong ol bai teistim bikpela kaikai bilong mi.”—Luk 14:21-24.

Dispela tok piksa Jisas i stori long en i kamapim klia samting Jehova i tokim Jisas Krais long mekim, em long invaitim ol man na bai ol i ken insait long Kingdom bilong heven. Ol Juda, moa yet ol bikman bilong lotu, ol i fes lain long kisim dispela invatesen. Tasol planti bilong ol i no amamas long tok Jisas i autim na i olsem ol i sakim dispela invatesen. Dispela invatesen i go tu long ol narapela lain. Tok bilong Jisas i kamapim klia olsem, bihain bai i gat namba 2 invatesen na dispela invatesen bai i go long ol man i no gat nem long lain Juda na long ol man i joinim lotu Juda. Na bihain bai i gat namba 3 invatesen, dispela em laspela invatesen, na em bai go long ol manmeri em ol Juda i ting ol i no klin long ai bilong God.—Aposel 10:28-48.

Tru tumas, tok bilong Jisas i strongim tok bilong wanpela visita husat i go tu long dispela kaikai. Em i tok: “Man i kaikai bret long Kingdom bilong God, em i ken amamas.”