Long hap is bilong maunten Oliv, i gat wanpela liklik ples i stap em Betani. Dispela ples i stap longwe long Jerusalem olsem 3 kilomita. (Jon 11:18) Jisas i go long dispela ples na em i kamap long haus bilong tupela susa, Marta na Maria. Dispela tupela susa na brata bilong ol, Lasarus, i gutpela pren bilong Jisas. Olsem na ol i welkamim em.

Ol i amamas tru olsem Mesaia i go long haus bilong ol. Marta i laik tru long mekim gut long Jisas, olsem na em i kirap redim ol samting bilong kukim bikpela kaikai. Marta i wok i stap na susa bilong em, Maria, i sindaun klostu long lek bilong Jisas na putim yau long tok bilong em. I no longtaim na Marta i tokim Jisas olsem: “Bikpela, yu no wari olsem susa bilong mi i larim mi tasol long mekim ol samting? Tokim em long kam helpim mi.”—Luk 10:40.

Tasol Jisas i no krosim Maria, nogat, em i stretim Marta bikos Marta i tingting planti long redim kaikai. Em i tok: “Marta, Marta, yu tingting planti na wari long planti samting. Yumi no gat wok long planti samting, ating wanpela samting tasol em inap long yumi. Maria i bin makim gutpela samting long mekim, na dispela samting i no inap tekewe long em.” (Luk 10:41, 42) Yes, Jisas i kamapim klia olsem i no gat wok long Marta i lusim bikpela haptaim long redim bikpela kaikai. Liklik kaikai tasol em inap.

Marta i mekim gutpela pasin. Em i laik lukautim gut visita bilong ol. Tasol em i tingting tumas long redim kaikai na nau em i no harim ol gutpela tok bilong God, em Pikinini Bilong God yet i skulim ol arapela long en! Jisas i kamapim klia olsem Maria i mekim gutpela disisen na dispela bai helpim em inap oltaim oltaim. Na dispela em gutpela skul yumi tu inap tingim.

Long narapela taim, Jisas i skulim ol long narapela bikpela samting. Wanpela disaipel i askim em: “Bikpela, skulim mipela long mekim beten olsem Jon i bin skulim ol disaipel bilong en.” (Luk 11:1) Inap 1 na hap yia i go pinis, Jisas i bin skulim ol long pasin bilong beten taim em i mekim Bikpela Tok Long Maunten. (Matyu 6:9-13) Tasol i luk olsem dispela disaipel i no stap long dispela taim, olsem na Jisas i kamapim gen ol bikpela tok long pasin bilong beten. Na em i mekim wanpela tok piksa i kamapim klia olsem em i bikpela samting long beten oltaim.

Em i tok: “Sapos wanpela bilong yupela i gat wanpela pren i stap na long biknait yu go long em na tok: ‘Pren, mi laik dinau long yu long 3-pela bret, long wanem, wanpela poro bilong mi i raun na nau tasol em i kam kamap long mi na mi no gat wanpela samting bilong givim em.’ Tasol man i stap insait i tok: ‘Maski givim hatwok long mi. Dua i lok pinis, na ol liklik pikinini bilong mi i stap wantaim mi long bet. Mi no inap kirap na givim yu wanpela samting.’ Mi tokim yupela: Dispela man i no kirap na givim wanpela samting long em bikos em i pren bilong en, nogat. Tasol em bai kirap na givim ol samting dispela pren i sot long en, long wanem, pren i strong long askim askim em.”—Luk 11:5-8.

Jisas i laik helpim ol long luksave olsem maski dispela man i les, pren bilong em i strong long askim askim em, olsem na em i kirap na i helpim dispela pren. Olsem tasol, taim yumi beten oltaim long Papa bilong yumi long heven husat i gat pasin laikim, orait yumi inap bilip tru olsem em bai harim singaut bilong ol gutpela wokman bilong em! Jisas i tok: “Mi tokim yupela: Wok yet long askim, na yupela bai kisim. Wok yet long painim, na yupela bai lukim. Wok yet long paitim dua, na dua bai op long yupela. Olgeta man i wok long askim, ol bai kisim, na olgeta man i wok long painim, ol bai lukim, na olgeta man i wok long paitim dua, dua bai op.”—Luk 11:9, 10.

Bilong kamapim klia insait bilong dispela tok, Jisas i mekim wanpela tok piksa long pasin bilong ol papa, em i tok: “Wanem papa namel long yupela bai givim snek long pikinini man taim em i askim long wanpela pis? O givim wanpela skopion taim em i askim long wanpela kiau? Sapos yupela ol man nogut inap givim ol gutpela presen long ol pikinini bilong yupela, orait yupela i ken save tru olsem Papa long heven bai givim holi spirit long ol man i askim em!” (Luk 11:11-13) Man! Em i gutpela samting tru long save olsem Papa bilong yumi i redi long harim beten bilong yumi na givim ol samting yumi nidim!