Nau tasol Jisas i stori gen long pasin bilong beten. Tasol i gat ol arapela samting tu em planti man i laik save long en na ol i askim gen long taim em i autim tok. Jisas i wokim ol mirakel long Galili, na ol man i sutim tok giaman long em olsem em i wokim ol mirakel long strong bilong hetman bilong ol spirit nogut. Nau long Judia, ol man i sutim wankain tok long em.

Wanpela spirit nogut i stap long wanpela man na i mekim em i mauspas. Taim Jisas i rausim spirit nogut long dispela man, planti i kirap nogut. Tasol ol birua bilong Jisas i no kirap nogut. Ol i sutim wankain tok giaman, olsem: “Em i save rausim ol spirit nogut long strong bilong Belsebul, em hetman bilong ol spirit nogut.” (Luk 11:15) Na sampela i laik lukim sampela mak moa bilong save Jisas em i husat tru, na ol i askim em long wokim wanpela mirakel olsem mak i kam long heven.

Jisas i luksave olsem ol i laik traim em, olsem na em i bekim tok bilong ol olsem em i bin mekim long ol dispela man i bin sutim tok long em long Galili. Em i tok sapos lain bilong wanpela kingdom i bruk long tupela lain, orait dispela kingdom bai i pundaun. Em i tok: “Sapos Satan na lain bilong en i bruk, orait olsem wanem bai kingdom bilong en i stap strong?” Nau Jisas i tokaut stret olsem: “Sapos long strong bilong pinga bilong God mi rausim ol spirit nogut, orait Kingdom bilong God i kam pinis na yupela i no luksave long en.”—Luk 11:18-20.

Jisas i tok “pinga bilong God,” na dispela i mas kirapim ol man i harim tok bilong em long tingim samting i bin kamap long taim bilong ol Israel. Ol manmeri long haus bilong Fero i bin lukim Moses i wokim wanpela mirakel, na ol i kirap nogut na tok: “Dispela em pinga bilong God!” Na tu, em dispela “pinga bilong God” i bin raitim ol tok bilong Tenpela Lo long tupela hap ston. (Kisim Bek 8:19, NW; 31:18, NW ) Olsem tasol, “pinga bilong God” em holi spirit o strong bilong em i helpim Jisas long rausim ol spirit nogut na oraitim ol sikman. Em nau, Kingdom Bilong God i kam pinis na ol dispela birua i no luksave long en, bikos man em God i makim olsem King bilong Kingdom, em Jisas, i stap namel long ol na i wokim ol dispela mirakel.

Jisas inap rausim ol spirit nogut na dispela i kamapim klia olsem strong bilong em i winim bilong Satan. I olsem wanpela man i gat bikpela strong i daunim soldia i holim ol samting bilong pait na i was long haus king. Na tu, Jisas i kolim gen tok piksa long wanpela spirit nogut i bin lusim wanpela man. Sapos dispela man i no putim gutpela tingting long bel bilong em, orait dispela spirit bai kam bek wantaim 7-pela arapela spirit nogut, na mekim dispela man i stap nogut moa winim bipo. (Matyu 12:22, 25-29, 43-45) Wankain samting i wok long kamap long lain Israel.

Wanpela meri i putim yau long tok bilong Jisas, bel bilong em i kirapim em long tok: “Dispela mama i karim yu long bel bilong en na givim susu long yu, em i ken amamas!” Ol meri Juda i gat laik long kamap mama bilong ol profet, moa yet mama bilong Mesaia. So ating dispela meri i ting olsem Maria i amamas tru olsem em i mama bilong dispela tisa. Tasol Jisas i helpim dispela meri long kisim stretpela tingting long as tru bilong amamas. Em i tok: “Nogat. Ol man i harim tok bilong God na bihainim, ol i ken amamas!” (Luk 11:27, 28) I no gat wanpela taim Jisas i tok ol man i mas givim ona long Maria, nogat. As tru bilong amamas em man i mas stap gut long God na mekim wok bilong em.

Olsem Jisas i bin mekim long Galili, em i krosim ol manmeri long askim em long wokim wanpela mirakel olsem mak i kam long heven. Em i tok ol i no inap lukim wanpela mak, tasol ol bai lukim “mak bilong Jona.” Jona i stap olsem mak, long wanem, em i bin stap long bel bilong pis inap 3-pela de, na bihain em i strongim bel na autim tok long ol manmeri bilong Ninive na ol i tanim bel. Jisas i tok: “Tasol, harim! Man i winim Jona em i stap long hia.” (Luk 11:29-32) Na Jisas i winim tu Solomon, em dispela man kwin bilong Seba i bin kam long harim savetingting bilong em.

Jisas i tok moa: “Taim man i laitim lam, em i no save haitim, o putim aninit long wanpela basket, nogat. Em  i save putim antap long tebol.” (Luk 11:33) Ating Jisas i laik tok olsem wok tisa na ol mirakel em i mekim i stap olsem lait long ai bilong ol manmeri. Tasol ai bilong ol dispela lain i no lukluk stret long em, olsem na ol i no luksave long as na em i mekim ol dispela wok.

Nau tasol Jisas i rausim spirit nogut long wanpela man na em inap toktok. Na dispela i mas kirapim ol manmeri long givim glori long God na tokim ol narapela long ol samting Em i mekim. So Jisas i givim tok lukaut long ol birua bilong em. Em i tok: “Olsem na was gut. Nogut lait i stap insait long yu i tudak. Sapos bodi olgeta bilong yu i lait na i no gat wanpela hap bilong en i tudak, orait bodi olgeta bai lait olsem wanpela lam i givim lait long yu.”—Luk 11:35, 36.