Jisas i lusim Jeriko long ples daun, na em i laik i go long Betani long ples maunten. Bilong go long Betani em i mas wokabaut klostu 20 kilomita. Jeriko i stap olsem 250 mita daunbilo long mak bilong solwara, na Betani i stap olsem 610 mita antap long mak bilong solwara. Lasarus na 2-pela susa bilong em i save stap long Betani, em i stap longwe long Jerusalem inap 3 kilomita samting, na em i stap long hap is bilong maunten Oliv.

Planti Juda i kamap pinis long Jerusalem bilong mekim bung bilong Pasova. Ol i bin kam paslain liklik bilong “mekim ol samting bilong kamap klin olsem lo i makim.” Ating ol i bin holim bodi bilong man i dai pinis o ol i mekim ol narapela samting na nau ol i no klin long mekim lotu. (Jon 11:55; Namba 9:6-10) Sampela manmeri i bin kam pas na ol i bung long tempel. Na ol i wok long stori long Jisas olsem em bai kam long Pasova o nogat.—Jon 11:56.

Long Jerusalem ol man i stori long Jisas na ol i tok pait. Sampela bikman bilong lotu i laik holim em bilong kilim em i dai. Ol bikman i toksave olsem, sapos wanpela man i save long hap Jisas i stap long en, orait em i mas kam na ripot long ol “na bai ol i ken holim em. ” (Jon 11:57) Bihain long Jisas i kirapim bek Lasarus, ol dispela bikman bilong lotu i bin traim long kilim em. (Jon 11:49-53) Olsem na ating sampela i toktok namel long ol yet olsem Jisas bai kam long hap planti man i bung long en o nogat.

Jisas i kamap long Betani long Fraide, em “6-pela de paslain long pasova.” (Jon 12:1) Nupela de (Sabat, Nisan 8) bai kirap long taim san i go daun. Olsem na em i pinisim raun bilong em paslain long Sabat. Em i no inap i go long Jeriko long Sarere, long wanem, i tambu long ol Juda i raun long de Sabat, kirap long taim san i go daun long Fraide na i go inap long taim san i go daun long Sarere. Ating Jisas i go long haus bilong Lasarus, olsem em i bin mekim bipo.

Wanpela man i stap long Betani, em Saimon, em i singautim Jisas na ol pren bilong en, na Lasarus tu, long i go kaikai wantaim em long Sarere apinun. Bipo ol i save kolim Saimon olsem “lepraman,” long wanem, ating em i bin i gat sik lepra na Jisas i oraitim em. Marta i wok strong long redim kaikai na mekim gut long ol manmeri i kam long kaikai. Tasol Maria i sindaun klostu long lek bilong Jisas, na em i mekim samting i skrapim bel bilong sampela.

Maria i opim wanpela botol i gat “hap lita sanda, em gutpela nad,” we i gat gutpela smel. (Jon 12:3) Dispela kain sanda i gat bikpela pe inap olsem 300 denarius, em pe wanpela wokman i kisim insait long wanpela yia! Nau Maria i kapsaitim sanda long het na lek bilong Jisas na em i mekim drai lek bilong Jisas long gras bilong em. Gutpela smel bilong sanda i pulap long haus olgeta.

Ol disaipel i bel nogut long dispela na ol i tok: “Bilong wanem dispela meri i westim nating dispela sanda?” (Mak 14:4) Na Judas Iskariot i tok: “Bilong  wanem ol i no salim dispela sanda long 300 koin denarius na givim dispela mani long ol rabisman?” (Jon 12:5) Tasol Judas i no tingim ol rabisman taim em i mekim dispela tok, nogat. Em i save stilim mani long bokis kontribusen em ol disaipel i lukautim.

Tasol Jisas i tok: “Bilong wanem yupela i laik givim hevi long dispela meri? Em i mekim gutpela pasin long mi. Oltaim ol rabisman bai i stap wantaim yupela, tasol mi bai i no stap oltaim wantaim yupela. Taim dispela meri i putim sanda long mi, em i mekim olsem bilong redim bodi bilong mi bilong putim long matmat. Mi tok tru long yupela: Long wanem wanem hap bilong graun ol i autim gutnius long en, ol bai stori tu long samting dispela meri i mekim, em bilong ol man i ken tingim em.”—Matyu 26:10-13.

Jisas i stap long Betani inap sampela de pinis, na planti man i harim olsem em i stap long dispela hap. Olsem na planti Juda i kam long haus bilong Saimon long lukim Jisas, na tu, ol i laik lukim Lasarus, “em dispela man Jisas i bin kirapim bek long dai. ” (Jon 12:9) Olsem na ol bikpris i bung na ol i pasim tok long kilim i dai Jisas na Lasarus. Ol i mekim olsem bikos Lasarus i stap laip gen na planti man i bilip long Jisas. Na dispela i kamapim klia olsem ol bikpris i man nogut.