Bihain long Jisas i kirap bek, em i laik bungim 11-pela aposel bilong em long wanpela maunten long Galili. Ol narapela disaipel tu i stap, inap olsem 500 olgeta, pastaim sampela bilong ol i gat tupela tingting long Jisas. (Matyu 28:17; 1 Korin 15:6) Tasol nau tok Jisas i mekim bai helpim olgeta wan wan bilong ol long bilip tru olsem em i stap laip.

Jisas i tok God i givim em namba bilong bosim olgeta samting long heven na long graun. Jisas i tokim ol: “Olsem na yupela i mas i go na kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.” (Matyu 28:18-20) Yes, Jisas i stap laip gen, na em i gat bikpela laik tru long ol disaipel i mas mekim wok bilong autim gutnius.

Olgeta manmeri i bilip long Jisas, em ol man, meri, na ol pikinini, ol i kisim wok bilong kamapim disaipel. Ol birua bai mekim sampela samting bilong pasim ol long autim tok na skulim ol man, tasol Jisas i tok: “God i givim mi namba long bosim olgeta samting long heven na long graun.” Olsem wanem dispela tok i strongim ol disaipel? Jisas i tok: “Harim! Mi stap wantaim yupela olgeta de i go inap long pinis bilong dispela taim.” Jisas i no tok olgeta manmeri i autim gutnius ol inap long mekim ol mirakel, nogat. Tasol oltaim holi spirit bilong God bai sambai long ol.

Bihain long Jisas i kirap bek, em i bin kamap long ol disaipel bilong em “insait long 40 de.” Em i kamap long ol long narapela narapela bodi na “em i mekim planti samting bilong kamapim klia long ol olsem em i stap laip.” Na em i tokim ol long “ol samting bilong kingdom bilong God.”—Aposel 1:3; 1 Korin 15:7.

Taim ol aposel i stap yet long Galili, Jisas i tokim ol long i go bek long Jerusalem. Taim em i bungim ol long Jerusalem, em i tok: “No ken lusim Jerusalem. Yupela i mas wetim dispela samting Papa i tok promis long en, em mi bin tokim yupela long en. Jon i baptaisim ol man long wara, tasol i no longtaim nau na yupela bai kisim baptais long holi spirit.”—Aposel 1:4, 5.

Bihain, Jisas i bung gen wantaim ol aposel. Em i bringim “ol i go inap long Betani,” em long hap is bilong maunten Oliv. (Luk 24:50) Jisas i tokim ol long ol samting bai kamap taim em i lusim ol, tasol ol i holim yet tingting olsem Kingdom bilong em bai stap long graun.—Luk 22:16, 18, 30; Jon 14:2, 3.

Ol aposel i askim Jisas: “Bikpela, ating yu bai stretim bek kingdom bilong Israel long nau?” Em i bekim tok olsem: “Em i no samting bilong yupela long save long ol taim na ol de. Papa i tok em samting bilong em yet long makim.” Jisas i tokim ol gen long wok ol i mas mekim, na em i tok: “Yupela bai kisim strong taim holi spirit i kam i stap long yupela. Na yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.”—Aposel 1:6-8.

Ol aposel i stap wantaim Jisas long maunten Oliv, na taim i kamap long em bai lusim ol, olsem na em i stat long i go antap long heven. I no longtaim na wanpela klaut i karamapim Jisas na ol i no lukim em moa. Taim Jisas i kirap bek, em i kisim bodi bilong man bilong graun. Tasol nau em i lusim bodi bilong graun na i kamap spirit na em i go antap long heven. (1 Korin 15:44, 50; 1 Pita 3:18) Ol aposel i sanap na lukluk yet i stap, na “tupela man em ol i pasim waitpela klos” i kam sanap klostu long ol. Dispela 2-pela man em ol ensel, na ol i tok: “Yupela ol man bilong Galili, bilong wanem yupela i sanap na lukluk i go antap long skai? Dispela Jisas, em God i bin kisim em i go antap long skai, em bai kam long wankain pasin olsem yupela i bin lukim em i go antap.”—Aposel 1:10, 11.

I no gat planti manmeri i lukim Jisas taim em i lusim graun na i go long heven, nogat. Ol gutpela aposel bilong em tasol i bin stap long dispela taim. “Long wankain pasin” Jisas bai kam bek, tasol  planti manmeri i no inap luksave olsem em i kam i stap. Lain bilong em tasol bai luksave olsem em i kirap pinis long mekim wok king long Kingdom.

Ol aposel i go bek long Jerusalem. Long ol de bihain, ol i bung wantaim ol narapela disaipel, na tu, “Maria, em mama bilong Jisas, na ol brata bilong Jisas.” (Aposel 1:14) Dispela lain i save bung wantaim na beten oltaim. Wanpela samting ol i beten long en em long makim wanpela disaipel long kisim ples bilong Judas Iskariot bambai namba bilong ol aposel i kamap 12-pela. (Matyu 19:28) Ol i laik makim wanpela disaipel husat i bin lukim ol wok Jisas i mekim na em i lukim Jisas bihain long em i kirap bek. Ol i pilai satu bilong painimaut long laik bilong God, na dispela em laspela taim Baibel i stori long pasin bilong pilai satu. (Song 109:8; Sindaun 16:33) Ol i makim Matias, em wanpela bilong ol 70 disaipel Jisas i bin salim ol i go autim tok, na ol i “putim em wantaim ol 11-pela aposel.”—Aposel 1:26.

Jisas i go antap long heven na tenpela de bihain, lain Juda i mekim Bikpela Bung Bilong Pentikos long yia 33 C.E. Inap olsem 120 disaipel i bung long wanpela rum antap long Jerusalem. Wantu tasol, wanpela nois i pairap olsem strongpela win i spit i kam na i pulapim haus ol i stap long en. Ol i lukim samting i olsem ol liklik hap paia i kamap na i go i stap antap long olgeta wan wan bilong ol. Olgeta disaipel i stat long mekim kain kain tokples. Dispela i makim olsem Jisas i salim holi spirit long ol, em dispela helpim em i bin tok promis long salim i kam!—Jon 14:26.