Josep na Maria i stap long Betlehem, ol i no go bek long Nasaret. Long de namba 8 bihain long taim Jisas i bon, ol i katim skin bilong em, olsem Lo God i givim long lain Israel i makim. (Wok Pris 12:2, 3) Na em pasin bilong ol Juda long givim nem long pikinini man long dispela de yet. Ol i givim nem Jisas long pikinini bilong ol, olsem ensel Gebriel i bin tok long en.

Nau em winim wanpela mun pinis na em de namba 40 bihain long mama i karim Jisas. Orait papamama bilong em i kisim em i go we? Ol i kisim em i go long tempel long Jerusalem, em klostu liklik long ples ol i stap long en. Lo Bilong God i tok, 40 de bihain long taim mama i karim pikinini man, em i mas i go long tempel na givim ofa bilong mekim em yet i kamap klin.—Wok Pris 12:4-8.

Maria i bihainim dispela tok, na em i kisim tupela liklik pisin balus i go olsem ofa. Dispela i soim olsem Josep na Maria i no gat planti samting. Olsem Lo i tok, ol i mas givim wanpela pikinini sipsip man na wanpela pisin balus olsem ofa. Tasol sapos meri i no gat sipsip man bilong givim olsem ofa, orait em i ken givim tupela pisin balus. Maria i no gat planti samting, olsem na em i givim tupela pisin balus olsem ofa bilong em.

Long tempel, wanpela lapun man i kam bungim Josep na Maria. Nem bilong en Simeon. God i tok promis long Simeon olsem paslain long em i dai, em bai lukim Krais, o Mesaia, em man Jehova i tok promis long en. Long dispela de, holi spirit bilong God i stiaim Simeon i go long tempel, long dispela hap em i bungim Josep na Maria wantaim pikinini bilong ol. Simeon i kisim dispela pikinini na i holim em.

Na Simeon i tenkyu long God, na i tok: “Nambawan Bikpela, nau yu larim wokboi bilong yu i dai wantaim bel isi olsem yu bin tok. Ai bilong mi i lukim pinis rot yu makim bilong kisim bek ol man, em yu bin kamapim long ples klia long ai bilong olgeta manmeri. Em i wanpela lait bilong rausim laplap i stap long ai bilong ol man bilong ol arapela lain, na em i wanpela bikpela lait long ol manmeri bilong yu, Israel.”—Luk 2:29-32.

Josep na Maria i kirap nogut long harim dispela tok. Simeon i mekim gutpela tok long ol na em i tokim Maria olsem, “dispela pikinini em i bilong mekim planti Israel i pundaun na bilong mekim planti i kirap gen,” na bel hevi Maria bai pilim i olsem wanpela bainat i sap i sutim bel bilong en.—Luk 2:34.

Long dispela de, wanpela profet meri tu i stap. Nem bilong en Ana, em i gat 84 krismas. Olgeta de em i save stap long tempel. Long dispela taim stret, Ana i kam bungim Josep, Maria, na bebi Jisas. Na em i tok tenkyu long God na em i kirap tokim ol manmeri long Jisas.

Tingim, Josep na Maria i amamas long ol samting i kamap long tempel! Tru tumas, olgeta dispela samting i kamapim klia olsem pikinini bilong ol em Man God i Tok Promis long salim i kam.