Long nait, Josep i kirapim Maria na i tokim em long samting em i lukim long driman. Ensel bilong Jehova i kamap long em long driman, na i tok: “Kirap na kisim pikinini wantaim mama bilong en na ranawe i go long Isip. Na stap long Isip inap long taim mi tokim yu long lusim dispela hap. Long wanem, klostu nau Herot i laik painim pikinini na kilim em i dai.”—Matyu 2:13.

Wantu tasol, Josep, Maria, na pikinini bilong ol i ranawe long nait. Gutpela tru na ol i ranawe hariap, long wanem, Herot i kisim save olsem ol glasman i bin giamanim em. Em i tokim ol olsem taim ol i lukim pinis pikinini, orait ol i mas kam bek na tokim em. Tasol ol i no mekim olsem, ol i go bek long ples bilong ol. Herot i belhat nogut tru. Em i tingting yet long kilim Jisas i dai, olsem na em i salim tok i go long Betlehem na ol ples i stap klostu olsem ol i mas kilim i dai olgeta pikinini man i gat 2-pela krismas na aninit long en. Em i tingim tok bilong ol dispela glasman bilong Is, olsem na em i makim ol pikinini i gat dispela kain krismas.

Ol i mekim pasin nogut tru long kilim i dai ol yangpela pikinini man! Yumi no save ol i bin kilim hamas pikinini man, tasol bikpela krai na singsing sori bilong ol mama bilong ol dispela pikinini i truim wanpela tok profet God i mekim long rot bilong profet Jeremaia.—Jeremaia 31:15.

Josep na famili bilong em i ranawe i go pinis long Isip, na nau ol i stap long hap. Tasol bihain ensel bilong Jehova i kamap gen long Josep long driman, na i tok: “Kirap na kisim pikinini wantaim mama bilong en na go long Israel. Ol man i laik pinisim laip bilong pikinini, ol i dai pinis.” (Matyu 2:20) Nau Josep i save olsem famili bilong em i ken i go bek long asples bilong ol. Dispela i truim narapela tok profet bilong Baibel, God i singautim  Pikinini bilong em long lusim Isip na i kam.—Hosea 11:1.

Josep i laik bai famili bilong em i go sindaun long Judia, ating em klostu long taun Betlehem, em ples ol i bin stap long en paslain long ol i ranawe i go long Isip. Tasol Josep i harim olsem pikinini man bilong Herot, em Arkelaus, i kamap king bilong Judia. Dispela pikinini i man nogut. Long narapela driman, God i givim tok lukaut long Josep long ol hevi bai painim ol. Olsem na Josep i kisim famili bilong em na ol i go long hap not na sindaun long taun Nasaret long hap bilong Galili, em ples i stap longwe long asples bilong lotu Juda. Jisas i go bikpela long dispela hap, na dispela i truim narapela tok profet: “Bai ol i kolim em man Nasaret.”—Matyu 2:23.