Ating yu save amamas tru long harim gutnius. Yu bai pilim olsem wanem sapos yu save olsem yu wantaim ol famili na ol pren bilong yu inap kisim save long gutnius?

Baibel i kamapim planti gutnius. God Jehova em Man i bin wokim olgeta samting long heven na graun, na em i kamapim olgeta tok i stap long Baibel. Em i stiaim ol man long raitim Baibel inap planti tausen yia i go pinis. God i bin stiaim Matyu, Mak, Luk, na Jon long raitim 4-pela buk bilong Baibel. Ol tok ol i raitim inap tru long helpim yumi olgeta.

Planti man i kolim dispela 4-pela buk olsem Ol Gutnius, long wanem, ol i tokaut long gutnius i stori long Jisas, em man God i makim bilong kisim bek yumi. Ol i tokaut olsem Jisas bai mekim wok king long Kingdom Bilong God long heven. Long rot bilong dispela Kingdom, ol man i bilip long Jisas ol bai kisim ol blesing bilong i stap oltaim.—Mak 10:17, 30; 13:13.

Bilong wanem God i stiaim 4-pela man long raitim stori bilong Jisas?

Fopela narapela narapela man i bin raitim stori bilong Jisas, bambai yumi inap save gut long ol tok na pasin bilong Jisas. Piksaim long tingting dispela samting: Fopela man i sanap klostu long tisa em olgeta man i save long em. Man i sanap long fran bilong tisa, em man bilong kisim takis. Man i sanap long rait sait em wanpela dokta. Na man i sanap long left sait, em man bilong kisim pis na gutpela pren bilong tisa. Man i sanap long baksait bilong tisa, krismas bilong em i liklik long dispela 3-pela narapela man. Matyu, Mak, Luk, na Jon i save bihainim onest pasin, tasol ol laik na tingting bilong ol i no wankain. Olsem na taim ol i stori long Jisas, pasin bilong ol long raitim ol tok i narapela narapela. Ol tok ol i raitim i opim rot long yumi inap kliagut tru long laip stori bilong Jisas, em Bikpela Tisa bilong yumi.

Man bilong kisim takis em i toktok long ol Juda. Olsem na em i bungim ol tok bilong Jisas na stori bilong ol samting i kamap long rot we ol Juda inap kisimgut tok bilong em. Na man i mekim wok dokta, em i stori moa long wok Jisas i mekim bilong  oraitim ol sikman na ol man i gat bagarap long bodi. Em i no stori long sampela samting em man bilong kisim takis i bin stori long en, o em i kamapim narapela sait bilong stori. Narapela man em gutpela pren bilong tisa, olsem na em i stori long ol tingting na pasin bilong Jisas. Yangpela man i no stori long planti samting, ol tok bilong em i sotpela na i kamapim ol bikpela poin. Maski i olsem, stori bilong dispela 4-pela man i stret na i tru. Yes, taim yumi ritim Ol Gutnius, yumi inap kliagut long ol wok bilong Jisas, ol tok em i skulim ol man long en, na ol pasin bilong em.

Sampela man i save tok, ‘Gutnius Bilong Matyu’ o ‘Gutnius Bilong Jon.’ Tasol ol dispela tok i no stret, long wanem, Matyu, Mak, Luk, na Jon i kamapim ol “gutnius i stori long Jisas Krais.” (Mak 1:1) Em risen na yumi bungim dispela 4-pela buk na kolim olsem Ol Gutnius.

Planti sumatin bilong Baibel i skelim olgeta tok i stap long Ol Gutnius, na ol i luksave olsem ol stori Matyu, Mak, Luk, na Jon i raitim i bin kamap tru. Long yia 170 C.E. samting, Tatian em man Siria husat i bin raitim ol buk, em i ritim na skelim ol tok bilong Ol Gutnius. Em i luksave olsem God i stiaim ol man long raitim ol dispela tok, na ol tok ol i raitim i stret na tru olgeta. Olsem na em i kamapim wanpela manuskrip (Diatessaron) we i stori long laip bilong Jisas na wok autim tok bilong em.

Buk Jisas Em i Rot, Tok i Tru, na Laip i stori gut long ol tok Jisas i autim na ol wok em i mekim taim em i stap long graun. Olsem na yumi inap kliagut long insait bilong planti tok profet na tok piksa bilong Jisas, na tu, long taim stret ol samting i bin kamap. Ol saveman i bin painim sampela rait bilong bipo, na dispela i helpim ol man long kliagut long ol samting i kamap long bipo, na tu, long tingting bilong ol man i raitim Ol Gutnius. Ol stori ol i raitim i bin kamap tru, tasol dispela i no makim olsem yumi mas strong long wanem taim stret ol samting i kamap. Buk Jisas Em i Rot, Tok i Tru, na Laip i kamapim ol stori yumi inap kliagut long en, na long dispela rot yumi save olsem ol tok bilong en i stret na i tru.

Bai yu amamas tru long ritim dispela buk. Mipela i laik kirapim yu wantaim ol famili na ol pren bilong yu long tingim gut astok bilong dispela buk. Jisas Krais i tokim aposel Tomas olsem: “Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.”—Jon 14:6.

Dispela buk Jisas Em i Rot, Tok i Tru, na Laip bai helpim yu long luksave long olsem wanem Jisas em i “rot.” Long rot bilong Jisas, yumi inap beten long God Jehova na toktok wantaim em. Na tu, God inap lusim ol sin bilong yumi na yumi stap wanbel wantaim em. (Jon 16:23; Rom 5:8) Yes, long rot bilong Jisas wanpela tasol, yumi inap stap pren bilong God.

Jisas em i “tok i tru.” Em i autim tok i tru, na ol pasin bilong em i stret wantaim ol tok em i autim. Na tu, em i bin truim planti tok profet. Baibel i tok, olgeta tok profet i kamap “Yes long rot bilong Jisas.” (2 Korin 1:20; Jon 1:14) Tru tumas, Jisas bai mekim ol bikpela wok bilong inapim ol samting God i tingting pinis long kamapim.—Revelesen 19:10.

Jisas Krais em i “laip.” Long rot bilong ofa bilong baim bek man, Jisas i givim laip bilong em i gutpela olgeta bambai yumi ol man inap kisim “laip tru,” em “laip oltaim.” (1 Timoti 6:12, 19; Efesus 1:7; 1 Jon 1:7) Na tu, Jisas bai givim “laip” long planti milion manmeri taim em i kirapim bek ol long matmat, na ol bai stap oltaim long Paradais long graun.—Jon 5:28, 29.

Em i bikpela samting long yumi mas kliagut long ol wok Jisas bai mekim bilong inapim ol samting God i tingting pinis long kamapim. Mipela i laik kirapim yu long kisim sampela save moa long Jisas, long wanem, em yet i bin tok: “Mi yet mi rot na tok i tru na laip.”