Yu inap tingim amamas yu kisim taim yu bung wantaim ol man i lotuim Jehova? Olsem, yu amamas taim yu go long kongrigesen miting o long wanpela kibung. O ating yu tingim wanpela naispela ekspiriens long taim yu autim tok, o yu na wanbilip i stori long ol gutpela tok yupela i kisim save long en? Dispela i soim olsem yu no lusim tingting long Jehova, na yu ken bilip tru olsem Em i tingim yu. God i tingim yet ol gutpela wok yu mekim long sapotim wok bilong Kingdom. Na Em i redi long helpim yu long kam bek long em.

Jehova i tok: “Bai mi yet mi painim ol sipsip bilong mi na kisim bek ol na lukautim ol gut. Bai mi mekim olsem wasman bilong sipsip i save painim ol sipsip bilong en i go nabaut. . . . Tasol bai mi go painim ol na kisim bek ol long olgeta hap ol i bin go long en.”​—Esekiel 34:11, 12.