KIRAPIM TOKTOK
LESEN 4
Pasin Daun
Stiatok: “Daunim yupela yet na tingim olsem ol arapela i winim yupela.”—Fili. 2:3.
Samting Pol i Mekim
1. Lukim VIDIO, o ritim Aposel 26:2, 3. Na skelim ol dispela askim:
-
Olsem wanem Pol i soim pasin daun taim em i toktok long King Agripa?
-
Olsem wanem Pol i stiaim tok i go long Jehova na long Baibel na i no long em yet?—Lukim Aposel 26:22.
Yumi Kisim Wanem Skul Long Pol?
2. Ol man bai pilim tok bilong yumi sapos yumi mekim long pasin daun na long pasin rispek.
Bihainim Pasin Bilong Pol
3. Toktok long pasin rispek. Abrusim pasin bilong soim olsem yu save long olgeta samting na narapela nogat. Toktok wantaim em long pasin rispek.
4. Kamapim klia olsem ol tok yu autim i kam long Baibel. Tok bilong Baibel inap mekim sampela samting long tingting na filings bilong ol man. Taim yumi mekim wok long Baibel, yumi helpim ol long bilip long Tok Bilong God na i no long tok yumi mekim.
5. Mekim pasin isi. No ken strong long kamapim olsem tok bilong yu i stret. Yumi no laik tok pait wantaim man. Soim pasin daun long rot bilong stap isi na luksave long wanem taim i gutpela long lusim man bilong haus na i go. (Prov. 17:14; Tai. 3:2) Taim yu bekim tok long pasin isi, ating long narapela taim man bai amamas long harim tok.
