Bilong Ol Brata na Sista:

Pasin bilong laikim God na ol manmeri i kirapim yumi long mekim samting Baibel i tok long en, olsem: “Go na kamapim ol disaipel long olgeta lain man, na baptaisim ol.” (Mat. 28:​19, 20; Mak 12:​28-31) Sapos yumi gat dispela kain pasin bilong laikim ol manmeri, yumi inap helpim “olgeta manmeri em bel bilong ol i gutpela long kisim laip oltaim.”—Apo. 13:48.

Long bipo, yumi save wok strong long tingim tingim ol kirap bilong tok na tilim ol buk na nius. Nau yumi mas wok strong long mekim pasin bilong yumi long toktok wantaim ol man i kamap gutpela moa. Yumi laik soim olsem yumi laikim ol narapela long rot bilong toktok wantaim ol long ol topik ol i gat laik long en. Dispela i makim olsem yumi bai redi long senisim tok, na yumi bai tingim gut ol samting ol man i tingting planti long en na ol samting ol i gat laik long en. Olsem wanem dispela buklet bai helpim yumi long mekim olsem?

Dispela buklet i gat 12-pela lesen i stori long ol pasin yumi mas kisim na bai yumi inap soim pasin laikim na kamapim ol disaipel. Wan wan lesen i kam long stori bilong Baibel we Jisas na ol narapela Kristen long taim bilong ol aposel i kamapim wanpela gutpela pasin long wok autim tok bilong ol. Samting yumi laik mekim, em long painim ol rot bilong soim pasin laikim long ol manmeri, i no tingim tingim tasol ol kirap bilong ol tok. Em tru olsem yumi mas kamapim ol gutpela pasin long wok autim tok bilong yumi, tasol yumi bai skelim olsem wanem sampela bilong ol dispela pasin em i bikpela samting long kamapim taim yumi kirapim toktok, mekim ol gobek, o mekim ol Baibel stadi.

Taim yu skelim wan wan lesen, tingim gut olsem wanem yu inap kamapim pasin em wan wan lesen i stori long en long taim yu toktok wantaim ol man long teritori bilong yu. Wok long strongim pasin bilong yu long laikim Jehova na ol manmeri. Dispela pasin laikim—winim ol narapela pasin yumi save bihainim long autim tok—bai helpim yumi long mekim samting yumi laik mekim, em long kamapim ol disaipel.

Mipela i amamas long wok wantaim yupela. (Sef. 3:9) Jehova i ken blesim yu taim yu wok yet long soim pasin laikim long ol manmeri na kamapim ol disaipel!