Josaia i kamap king bilong Juda taim em i gat 8-pela krismas. Long dispela taim, ol manmeri i save mekim wok mejik na lotuim ol imis. Taim Josaia i gat 16 krismas, em i laik save long stretpela pasin bilong lotuim Jehova. Taim em i gat 20 krismas, em i kirap bagarapim ol imis na alta long olgeta hap bilong kantri. Na taim Josaia i gat 26 krismas, em i arensim ol samting long stretim tempel bilong Jehova.

Long tempel, Hetpris Hilkia i painim skrol i gat Lo Bilong Jehova—ating em dispela skrol Moses i raitim. Sekreteri bilong king, Safan, i bringim skrol i go long Josaia na em i kirap ritim Lo long strongpela nek. Taim Josaia i harim, em i luksave olsem ol manmeri i sakim tok bilong Jehova inap planti yia. King Josaia i tokim Hilkia: ‘Jehova i belhat nogut tru long yumi. Go na toktok long em. Jehova bai tokim yumi long samting yumi mas mekim.’ Jehova i bekim tok long rot bilong profet meri Hulda: ‘Ol manmeri bilong Juda i lusim mi pinis. Ol bai kisim panismen, tasol i no long taim Josaia i stap king, bikos em i daunim em yet.’

Taim King Josaia i harim dispela tok, em i go long tempel na singautim ol manmeri bilong Juda i kam bung. Na em i ritim Lo Bilong Jehova long strongpela nek long olgeta manmeri. Josaia na ol manmeri i tok promis long bihainim tok bilong Jehova long bel olgeta.

 Ol manmeri bilong Juda i no bin mekim bung bilong Pasova inap planti yia. Tasol taim Josaia i ritim Lo olsem ol i mas mekim bung bilong Pasova long olgeta yia, em i tokim ol manmeri: ‘Yumi bai mekim bung bilong Pasova long Jehova.’ Bihain Josaia i redim planti sakrifais na makim ol singa bilong tempel. Ol manmeri i mekim Pasova, na bihain Bikpela Bung Bilong Bret i No Gat Yis, dispela bung i stap inap 7-pela de. Kirap long taim bilong Samuel i no gat wanpela bung bilong Pasova olsem dispela. Josaia i laikim tru Lo Bilong God. Yu amamas long kisim save long Jehova?