Kisim tok long ol buk samting em yu bilip long tok bilong en. Ol tok bilong Baibel i mas i stap as bilong ol tok yu kamapim, na yu mas ritim ol tok bilong en sapos rot i op long mekim olsem. Sapos yu stori long wanpela samting bilong saiens, o wanpela ripot long nius, o wanpela ekspiriens, o narapela buk samting, orait paslain skelim gut olsem ol dispela tok i tru na i stret long nau o nogat.

Mekim stretpela wok long ol buk samting. Stori gut long ol skripsa i stret long ol tok i stap klostu long en, na bikpela tok bilong Baibel, na ol buk na nius bilong “gutpela wokboi i gat savetingting.” (Mat. 24:45) Taim yu yusim ol buk samting em Baibel i no as bilong en, yu mas mekim stretpela wok long en na no ken senisim mining bilong en o kamapim samting em man i raitim dispela buk i no bin kamapim.

Helpim ol man i harim tok bilong yu long tingting gut long samting yu stori long en. Taim yu ritim pinis wanpela skripsa o kolim tok bilong wanpela buk, kamapim ol askim long pasin isi o kamapim klia poin bilong tok bilong yu bilong helpim ol man na bai ol yet i wokim tingting.