LESEN 16
Jisas i Mekim Wanem Taim Em i Stap Long Graun?
Planti man i tingim Jisas olsem wanpela bebi i slip long bokis kaikai bilong ol animal o olsem wanpela profet. Tasol yu ting yumi inap kisim save moa long em sapos yumi skelim laip bilong em long graun? Long dispela lesen, bai yumi skelim sampela bikpela samting Jisas i bin mekim, na hau dispela inap helpim yu.
1. Wanem nambawan wok bilong Jisas?
Nambawan wok bilong Jisas em long “autim gutnius bilong Kingdom Bilong God.” (Ritim Luk 4:43.) Em i autim gutnius olsem God bai kamapim wanpela kingdom o gavman we bai pinisim olgeta hevi bilong ol man. a Inap 3 na hap yia, Jisas i wok strong long tokim ol manmeri long dispela gutpela tok i strongim ol.—Matyu 9:35.
2. I gat wanem as na Jisas i wokim ol mirakel?
Baibel i stori long planti “strongpela wok na ol narakain samting na ol mirakel God i wokim . . . long han bilong [Jisas].” (Aposel 2:22) God i givim strong long Jisas na em inap long kontrolim weda, givim kaikai long planti tausen manmeri, oraitim ol sikman, na kirapim bek ol man i dai pinis. (Matyu 8:23-27; 14:15-21; Mak 6:56; Luk 7:11-17) Ol mirakel Jisas i wokim i kamapim klia olsem God i bin salim em i kam. Na tu, ol mirakel i soim olsem Jehova i gat strong long stretim olgeta hevi bilong yumi.
3. Yumi inap kisim wanem skul long pasin bilong Jisas?
Long olgeta taim Jisas i bihainim tok bilong Jehova. (Ritim Jon 8:29.) Maski ol man i birua long Jisas, em i stap gut long Papa bilong em na mekim olgeta samting em i askim em long mekim i go inap long dai bilong em. Em i kamapim klia olsem ol man inap mekim wok bilong God, maski kain kain hevi i bungim ol. Olsem na Jisas i stap “gutpela piksa bai [yumi] ken bihainim gut lek mak bilong em.”—1 Pita 2:21.
KISIM SAMPELA SAVE MOA
Skelim olsem wanem Jisas i autim gutnius long ol manmeri na wokim ol mirakel.
4. Jisas i autim gutnius
Jisas i wokabaut inap planti handret kilomita long ol rot i gat planti das long en bilong autim gutnius long planti manmeri. Ritim Luk 8:1, na stori long ol dispela askim:
-
Olsem wanem? Jisas i autim tok tasol long ol manmeri i bung bilong harim tok bilong em?
-
Jisas i mekim wanem bilong bungim ol manmeri?
God i tok profet olsem Mesaia bai autim gutnius. Ritim Aisaia 61:1, 2, na stori long ol dispela askim:
-
Olsem wanem Jisas i inapim dispela tok profet?
-
Yu ting ol manmeri long nau i mas harim dispela gutnius?
5. Jisas i skulim ol man long ol gutpela tok ol i mas bihainim
Jisas i autim gutnius bilong Kingdom Bilong God, na tu, em i skulim ol man long ol gutpela tok ol i ken bihainim. Skelim sampela bilong ol dispela tok long Bikpela Tok Long Maunten em i bin mekim. Ritim Matyu 6:14, 34 na 7:12, na stori long ol dispela askim:
-
Jisas i givim wanem ol gutpela edvais long ol dispela ves?
-
Yu ting ol dispela edvais inap helpim ol man long nau?
6. Jisas i wokim ol mirakel
Jehova i givim strong long Jisas long wokim planti mirakel. Bilong lukim wanpela eksampel, ritim Mak 5:25-34 o pilaim VIDIO. Na stori long ol dispela askim.
-
Long vidio, dispela meri i bilip long wanem samting?
-
Yu pilim tru wanem samting long dispela mirakel?
Ritim Jon 5:36, na stori long dispela askim:
-
Ol mirakel Jisas i wokim i “tokaut,” o kamapim klia wanem samting long Jisas?
Yu save long dispela?
Planti stori bilong Jisas yumi save long en i stap long fopela buk bilong Baibel, ol i kolim Ol Gutnius—Matyu, Mak, Luk, na Jon. Olgeta wan wan bilong ol i stori long narapela narapela samting bilong Jisas. Taim yumi ritim dispela 4-pela Gutnius, yumi kisim save long laip bilong em.
-
MATYU
i raitim buk bilong em pastaim. Em i stori long planti tok Jisas i skulim ol man long en, moa yet long Kingdom Bilong God.
-
MAK
i raitim sotpela buk. Dispela buk i stori long planti samting Jisas i bin mekim.
-
LUK
i stori olsem beten i bikpela samting long Jisas na em i stori tu long pasin Jisas i mekim long ol meri.
-
JON
i stori long planti samting em Jisas i toktok long en wantaim ol pren bilong em na ol arapela manmeri. Dispela i helpim yumi long kisim save long Jisas i wanem kain man.
SAMPELA MAN I TOK: “Jisas em God i Gat Olgeta Strong.”
-
Wanem tingting bilong yu?
OL BIKPELA POIN
Jisas i autim tok long Kingdom Bilong God, wokim ol mirakel, na bihainim tok bilong Jehova long olgeta samting.
Riviu
-
Wanem nambawan wok Jisas i mekim taim em i stap long graun?
-
Ol mirakel Jisas i wokim i kamapim klia wanem samting?
-
Jisas i skulim ol man long wanem ol gutpela tok?
MEKIM WOK PAINIMAUT
Wanem topik Jisas i stori planti long en?
“Kingdom Bilong God—Bikpela Samting Long Jisas” (Wastaua, Oktoba 1, 2014)
Skelim wai na yumi ken bilip tru olsem ol mirakel bilong Jisas i bin kamap tru.
“Ol Mirakel Bilong Jisas—Yu Inap Kisim Wanem Save Long En?” (Wastaua, Julai 15, 2004)
Ritim hau eksampel bilong Jisas long daunim laik bilong em yet i helpim wanpela man long senisim laip bilong em.
“Mi Kisim Pasin Bilong Tingim Mi Yet Tasol” (Wastaua, Oktoba 1, 2014)
Lukim long lista ol bikpela wok Jisas i mekim stat long taim em i kirap mekim wok bilong em na i go.
a Lesen 31-33 bai stori long Kingdom Bilong God.
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
