LESEN 24
Yumi Inap Kisim Wanem Stretpela Save Long Ol Ensel?
Jehova i laik bai yumi kisim save long famili bilong em long heven. Ol ensel tu i insait long dispela famili. Baibel i kolim ol olsem ol “pikinini man bilong God.” (Jop 38:7) Baibel i tok wanem long ol ensel? Ol ensel i save mekim wanem long ol man? Yu ting olgeta ensel i insait long famili bilong God?
1. Ol ensel ol i husat?
Jehova i wokim ol ensel paslain long em i wokim graun. Ol ensel i wankain olsem em, ol i spirit na ol i stap long heven. (Hibru 1:14) I gat planti milion ensel, na ol wan wan i gat pasin bilong ol yet. (Revelesen 5:11) Ol i “bihainim tok bilong [Jehova], na mekim ol samting em i tok long en.” (Buk Song 103:20) Long bipo, sampela taim Jehova i salim ol ensel long bringim ol tok, sapotim, na helpim lain bilong em. Long nau, ol ensel i save stiaim ol Kristen i go long ol man i laik kisim save long God.
2. Satan na ol spirit nogut ol i husat?
Sampela ensel i no stap gut long Jehova. Fes ensel i bikhet “ol i kolim em Devil na Satan. Em man i save giamanim olgeta manmeri bilong graun.” (Revelesen 12:9) Satan i laik bosim ol narapela, so em i pulim namba 1 man na meri long bikhet long Jehova na em i pulim tu sampela ensel. Ol dispela bikhet ensel ol i spirit nogut. Jehova i rausim ol long heven i kam long graun, na ol bai kisim bagarap.—Ritim Revelesen 12:9, 12.
3. Long wanem rot Satan na ol spirit nogut i laik giamanim yumi?
Satan na ol spirit nogut i wok long giamanim planti manmeri long rot bilong wok bilong ol spirit nogut, em pasin bilong toktok wantaim ol spirit nogut. Olsem, sampela i save go long ol man bilong lukluk long ol sta, man i save tokaut long ol samting bai kamap bihain, na ol glasman. Na sampela taim ol i sik, ol i go lukim ol glasman, tasol wok bilong ol glasman i insait tu long wok bilong ol spirit nogut. Satan na ol spirit nogut i trikim ol man long bilip olsem ol inap toktok wantaim ol man i dai pinis. Tasol Jehova i givim tok lukaut olsem: ‘No ken go lukim ol man i save toktok wantaim ol daiman, na no ken kisim tingting bilong ol man i save tokaut long ol samting bai kamap bihain.’ (Wok Pris 19:31) Em i givim dispela tok lukaut bilong banisim yumi long Satan na ol spirit nogut. Ol i birua bilong God, na ol i laik bagarapim yumi.
KISIM SAMPELA SAVE MOA
Kisim save long ol gutpela samting ol ensel i mekim, na ol samting nogut em wok bilong ol spirit nogut i save kamapim, na olsem wanem yumi ken banisim yumi yet na Satan na ol spirit nogut i no ken mekim nogut long yumi.
4. Ol ensel i save helpim ol man long kisim save long Jehova
Ol ensel bilong God yet i no save autim tok long ol man, nogat. Ol i save stiaim ol manmeri i lotuim God i go long ol manmeri i laik kisim save long em. Ritim Revelesen 14:6, 7, na stori long ol dispela askim:
-
Wai na yumi nidim ol ensel long helpim yumi long autim tok?
-
Taim yu kisim save olsem ol ensel inap stiaim yu i go long ol man i laik harim tok bilong Baibel, dispela i strongim yu? Bilong wanem yu pilim olsem?
5. Sakim wok bilong ol spirit nogut
Satan na ol spirit nogut, ol i birua bilong Jehova. Na ol i birua bilong yumi tu. Ritim Luk 9:38-42, na stori long dispela askim:
-
Ol spirit nogut i save mekim wanem long ol man?
Yumi no laik ol spirit nogut i stiaim yumi. Ritim Lo 18:10-12, na stori long ol dispela askim:
-
Long wanem ol rot ol spirit nogut i traim long stiaim yumi na toktok wantaim yumi? Long hap bilong yu, wanem ol wok bilong ol spirit nogut em ol man i save mekim?
-
Yu ting i stret Jehova i tambuim wok bilong ol spirit nogut? Bilong wanem yu ting olsem?
Pilaim VIDIO, na stori long ol dispela askim.
-
Yu ting paspas em Pamela i putim long han bilong bebi inap nogutim em? Bilong wanem?
-
Pamela i mas mekim wanem bilong banisim em yet na ol spirit nogut i no ken mekim nogut long em?
Ol Kristen tru i save sakim ol spirit nogut. Ritim Aposel 19:19 na 1 Korin 10:21, na stori long dispela askim:
-
Wai na em i bikpela samting long bagarapim olgeta samting yu holim we wok bilong ol spirit nogut i insait long en?
6. Winim pait na sakim Satan na ol spirit nogut
Satan i bosim ol spirit nogut. Tasol nambawan ensel Maikel, em narapela nem bilong Jisas, em i go pas long ol gutpela ensel. Strong bilong Maikel i bikpela olsem wanem? Ritim Revelesen 12:7-9, na stori long ol dispela askim:
-
Husat i gat bikpela strong moa? Maikel na ol ensel bilong em o Satan na ol spirit nogut?
-
Yu ting ol disaipel bilong Jisas i mas pret long Satan na ol spirit nogut?
Yu inap winim pait bilong sakim Satan na ol spirit nogut. Ritim Jems 4:7, na stori long dispela askim:
-
Hau bai yu banisim yu yet na Satan na ol spirit nogut i no ken mekim nogut long yu?
SAMPELA MAN I TOK: “I no gat rong long pilaim ol gem na lukim ol muvi i stori long wok bilong ol spirit nogut. Em samting bilong kisim amamas tasol.”
-
Wai na dispela tingting inap nogutim yu?
OL BIKPELA POIN
Ol gutpela ensel i save helpim yumi. Satan na ol spirit nogut ol i birua bilong Jehova, na ol i yusim wok bilong ol spirit nogut bilong giamanim ol man.
Riviu
-
Olsem wanem ol ensel bilong Jehova i helpim ol man long kisim save long em?
-
Satan na ol spirit nogut ol i husat?
-
Wai na yu mas i stap longwe long wok bilong ol spirit nogut?
MEKIM WOK PAINIMAUT
Lukim evidens i soim olsem Jisas em i nambawan ensel Maikel.
Skelim ol samting i soim olsem Devil i no wanpela pasin nogut i stap insait long yumi.
“Yu Ting Devil Em Wanpela Man i Stap Tru?” (Atikol long websait)
Lukim hau wanpela meri i lusim kalabus bilong wok bilong ol spirit nogut.
“Nau i Stap Bilong Em i Gat As Bilong En” (Wastaua, Julai 1, 1993)
Kisim save long hau Satan i yusim wok bilong ol spirit nogut bilong giamanim ol man.
“The Truth About Magic, Sorcery, and Witchcraft” (The Road to Everlasting Life, part 5)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
