Jehova bai pinisim olgeta wok nogut bilong Satan. Jehova i putim Jisas i stap King pinis na em bai bosim olgeta hap bilong graun. Taim em i bosim graun bai graun i kamap gutpela ples paradais.—Daniel 7:13, 14; Aisaia 35:1, 2.

Tok promis bilong Jehova i olsem:

• BAI I GAT PLANTI KAIKAI: “Planti gutpela kaikai” bai kamap long graun. God bai “mekim gut tru” long ol manmeri. “Planti rais na wit samting i ken kamap long ol gaden.”—Buk Song 67:6; 72:16.

• NO GAT PAIT MOA: “Kaman! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun.”—Buk Song 46:8, 9.

• NO GAT MAN NOGUT: “Ol man nogut bai i bagarap olgeta. . . . I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.”—Buk Song 37:9, 10.

•  NO GAT SIK, O BEL HEVI, O I DAI: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”—Aisaia 35:5, 6.

  “God yet bai i stap wantaim ol, . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—Kamapim Tok Hait 21:3, 4.

Jehova i no olsem Satan na ol spirit nogut—Jehova i no save giaman. Olgeta tok promis bilong em i mas kamap tru. (Luk 1:36, 37) Jehova i laikim yu tumas na em i laik bai yu stap long gutpela ples Paradais em i laik kamapim long graun. Olsem na tokim ol Witnes Bilong Jehova long helpim yu long kisim sampela save moa long ol gutpela tok i tru i stap long Baibel, em Tok bilong God. Sapos yu kisim dispela save na yu bihainim ol dispela tok, bai ol tok giaman na bilip giaman i no ken kalabusim yu moa. Na bihain bai sin na i dai tu i no ken kalabusim yu moa. Olsem Jisas i tok: “Yupela bai i save long tok tru, na tok tru bai i mekim yupela i kamap fri.”—Jon 8:32.