I no longtaim na bai Satan na ol spirit nogut i no inap giamanim moa ol man. Jehova i rausim ol pinis long heven. (Kamapim Tok Hait 12:9) Klostu nau bai em i kirap mekim narapela samting long ol. Em i givim driman long aposel Jon na Jon i lukim “wanpela ensel i lusim heven na i kam daun. . . . Em i holimpas dispela bikpela snek, em snek bilong bipo tru, em Satan . . . Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim.” (Kamapim Tok Hait 20:1-3) Bihain bai Satan na ol spirit nogut i pinis olgeta.—Kamapim Tok Hait 20:10.

Ol man nogut long graun ol tu bai ol i pinis.—Buk Song 37:9, 10; Luk 13:5.

Taim Satan na ol spirit nogut i kalabus pinis, orait nau bai Jehova i mekim planti gutpela samting long ol man. Ol man i dai ol i no gat laip, ol i no i stap. Yu tingim? Jisas i tok i olsem ol i slip—ol i slip i dai na ol i no driman. (Jon 11:11-14) Em i tok olsem, long wanem em i save, ol man i dai pinis bihain bai ol i kirap na i stap laip gen. Em i tok: “Taim i laik kamap na olgeta manmeri i stap long matmat ol bai i . . . lusim matmat na i kam ausait.”—Jon 5:28, 29; lukim Aposel 24:15.

Bai ol i stap laip gen long graun. Long dispela taim bai i no gat tokaut olsem wanpela man i dai—bai yumi harim tasol gutpela tokaut olsem ol man i dai pinis ol i kirap bek na i stap laip gen! Bai yumi amamas tru long bungim gen ol manmeri yumi laikim tumas ol, em ol i lusim matmat!