Baibel i tok, Satan i “giamanim olgeta manmeri bilong graun.” (Kamapim Tok Hait 12:9) Satan na ol spirit nogut i no laik bai yumi bilipim Tok bilong God, em Baibel. Ol i laik mekim na bai yumi ting ol man i dai pinis i stap laip yet long ples spirit. Ol i mekim olsem wanem? Orait, nau yumi ken stori.

Planti lotu i lainim ol man olsem yumi gat tewel na taim yumi dai, tewel i go i stap long ples spirit. Ol i tok, skin tasol i dai, tewel nogat. Ol i tok, tewel i no inap i dai.

Tasol Baibel, em Tok Bilong God, i no tok olsem. Baibel i tok, strong bilong laip i stap insait long skin bilong yumi, tasol yumi no gat tewel. Baibel i stori long God i wokim Adam na i tok: “God, Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” (Stat 2:7) Em nau, God i no givim tewel long Adam; God i givim laip long em.

 God i givim laip long ol animal tu.—Stat 1:20, 21, 24, 30.

Yumi man i wankain olsem ol animal. Yumi no gat tewel. God i bin kisim graun na wokim man na animal na tupela i save pulim win na i stap laip. Man wantaim ol animal i gat laip na taim ol i dai, laip bilong ol i pinis. Ol i dai olgeta na tanim i kamap graun gen.—Saveman 3:18-20; Stat 3:19.

Yumi no gat tewel, tasol yumi gat dispela strong bilong i stap laip wankain olsem long ol animal. Taim yumi dai, dispela strong bilong i stap laip o “spirit” i pinis long skin bilong yumi na “i go bek long God.” Insait bilong dispela tok i olsem: Nau strong bilong kirapim gen laip bilong yumi i stap long han bilong God.—Saveman 12:7; Luk 23:46; long Buk Song 104:29, 30, ol i tanim tok “spirit” olsem “win.”

Baibel i no lainim yumi olsem yumi gat tewel. Nogat. Satan na ol spirit nogut i lainim ol man olsem. Jehova i nolaik tru long olgeta tok giaman bilong ol lotu.—Sindaun 6:16-19; 1 Timoti 4:1, 2.

Narapela rot bilong Satan long giamanim ol man em long rot bilong ol wailis bilong ol spirit, olsem ol man o meri i save kisim tok i kam long ol spirit. Planti man tru, na ol dispela wailis yet, i ting ol dispela spirit em tewel bilong ol man i dai pinis. Tasol Baibel i tok, ol man i dai pinis i no inap toktok—ol i dai tru na ol i no inap mekim wanpela samting.—Saveman 9:5, 6, 10.

Orait, ol dispela tok i kam long husat tru? Long ol spirit nogut tasol! Ol inap lukim man taim em i stap laip yet; ol i save long pes bilong em na pasin bilong em long toktok na ol samting em i bin mekim na ol samting em i save long en. Olsem na i no hatwok long ol i giaman na makim man i dai pinis.—1 Samuel 28:3-19.

Narapela rot bilong Satan bilong strongim dispela tok giaman olsem ol man i dai pinis ol i stap laip yet, em ol stori giaman. Ol dispela kain stori i save paulim tingting bilong ol man na ol i no bilipim tok i tru bilong Baibel.—2 Timoti 4:4.

Long Afrika planti man i save stori olsem ol i bin lukim man bihain long taim em i dai. Tasol ating man i lukim pes samting bilong wanpela man i kain olsem bilong man i dai pinis na em i ting em i lukim dispela man yet. Olsem: Tupela Kristen i autim tok long hap bilong bus na tupela i lukim wanpela lapun i bihainim ol inap sampela aua. Taim ol i askim em bilong wanem em i bihainim ol, em i tok em i ting wanpela em i brata bilong em i bin dai sampela yia bipo. Tingting bilong lapun i kranki stret. Kristen hia i strong long tokim lapun em i no brata bilong em, tasol lapun i no laik senisim tingting. Orait, yu ting lapun i go mekim wanem kain stori long ol pren na wanples bilong em?

Ating yu bin harim stori bilong sampela narapela kain samting ol man i bin lukim o harim  o driman long en na dispela i mekim ol i pret nogut tru. Wanpela meri i bin stap long Wes Afrika, nem bilong em Marein. Tumbuna mama bilong em i dai pinis, tasol long olgeta taim long nait, Marein i save harim nek bilong tumbuna i singaut long em. Marein i save pret nogut tru na singaut strong na bai olgeta wanhaus i lusim slip na kirap. Bihain Marein i kamap longlong.

Orait, sapos ol man i dai pinis ol i stap laip yet, yu ting ol bai mekim pretim famili na ol narapela man ol i laikim tumas? Nogat, a? Ol spirit nogut i as bilong ol dispela tok i nogutim man.

Tasol olsem wanem long ol tok i olsem i bilong helpim man o mekim gut bel bilong man? Olsem: Wanpela meri bilong Siera Leon, em Gabase, em i sik. Papa i dai pinis, tasol Gabase i lukim em long driman. Papa i tokim em long i go long wanpela diwai na kisim lip na tanim wantaim wara na dring, na em i no ken tokim wanpela man pastaim. Gabase i bihainim tok, na sik i pinis.

Narapela meri i tok, man bilong em i bin kamap long em wanpela nait bihain long taim man i dai. Em i tok man i bilas gut long ol gutpela klos.

 Ol dispela kain tok na samting ol i lukim i olsem i gutpela na i bilong helpim man. Tasol God i no as bilong en. Jehova em i “God bilong mekim pasin tru tasol.” (Buk Song 31:5) Em i no ken orait long wanpela i trikim o giamanim yumi. Ol spirit nogut tasol i save mekim olsem.

Tasol ating sampela spirit nogut i save mekim gutpela wok? Nogat. Olgeta i nogut tasol. Taim Satan i toktok wantaim Iv i olsem em i laik helpim Iv. (Stat 3:1) Tasol taim Iv i bihainim tok bilong Satan, wanem samting i painim Iv? Em i dai.

Yu save, ol man nogut i save mekim pasin olsem pren bilong man na bai ol i giamanim em o stilim samting bilong em. Wanpela trupela tok bilong ol Afrika i olsem: “Tit i waitpela, tasol tingting bilong bel i nogut.” Na Baibel i tok: “Satan yet i save senisim pasin bilong en na kamap olsem ensel bilong lait.”—2 Korin 11:14.

God i no save givim tok moa long ol man long rot bilong driman o nek samting i kam long heven. Em i save stiaim na skulim ol man long rot bilong Baibel, em inap helpim man long “mekim olgeta kain gutpela wok.”—2 Timoti 3:17.

Olsem na taim Jehova i toksave long yumi long ol trik bilong Satan, em i mekim olsem, long wanem em i laikim tumas yumi. Em i save ol spirit nogut i birua bilong yumi na ol inap bagarapim yumi.