Tingim dispela: David i draiv i go long wanpela nupela hap. Em i lukim ol sain long strit na ol bilding samting na em i luksave olsem em i stap long rong rot. Nau David i save em i lus. Ating long sampela hap namel long raun bilong em, em i bin kisim narapela rot na em i no kisim rot em i bin tingting long bihainim.

Sapos yu David, bai yu mekim wanem?

I gat sampela rot yu ken bihainim:

1. Askim wanpela long soim yu rot.

2. Skelim wanpela mep.

3. Draiv yet i go, na tingting olsem yu bai painim rot yu laik go long en.

Namba 3 rot i no inap helpim yu liklik.

Namba 2 rot em i gutpela moa winim namba 1 rot. As bilong dispela em olsem, mep bai stap long kar taim yu wok long mekim dispela raun bilong yu, na mep bai helpim yu na stiaim yu long rot yu laik bihainim.

Baibel inap stap olsem mep na helpim yu!

Dispela nambawan buk tru i ken

• stiaim yu long taim yu gat hevi

• helpim yu long save gut long yu yet na mekim samting bilong kamap gutpela man o meri

• soim yu long hau yu ken i gat gutpela laip tru

Kirap long taim yumi lain long toktok, yumi save mekim ol askim olsem:

• Wai na skai i blupela?

• Ol sta i kamap long wanem samting?

Bihain yumi kirap mekim ol askim long ol samting long i stap bilong yumi olsem:

• Wai na ol samting nogut i save kamap?

• Wai na ol man i save dai?

Bai yu pilim olsem wanem sapos yu save olsem bekim bilong ol dispela askim i stap long Baibel long bipo yet na i kam inap long nau?

Planti man i tok Baibel i pulap long ol stori nating na ol stori bilong bipo na em i olpela pinis, na i hatwok long kliagut long ol tok bilong en. Tasol tru tru Baibel em i kain buk olsem? O ol man yet i no gat stretpela save long Baibel? Yu ting sampela man i bin giamanim ol?

Olsem, ol man i ting Baibel i tok olsem God i bosim dispela graun. Yu ting dispela em i tru? Dispela graun i pulap long ol pasin nogut! Graun i pulap tru long pen na hevi, sik na indai, pasin bilong stap rabis na ol bikpela disasta. Hau na God i gat pasin laikim bai kamapim ol kain samting olsem?

Yu laik save long bekim? Ating bai yu kirap nogut long save long tok Baibel i mekim long husat tru i bosim dispela graun!

Ating yu luksave pinis olsem ol edvais i stap insait long dispela buklet i kam long Baibel. Ol Witnes Bilong Jehova i bilip tru olsem Baibel em gutpela rot tru bilong kisim ol tok bilong stiaim yumi. Em bikos “God em i as bilong olgeta tok i stap long Rait Holi, na ol i gutpela long skulim man, stretim man, mekim ol samting i kamap stret.” (2 Timoti 3:16, 17) I gutpela yu yet i skelim dispela buk bilong bipo em ol tok bilong en i stret yet long nau!