Tingim dispela: Karen i stap long wanpela pati i no winim 10-pela minit yet na em i harim nek bilong wanpela em i save long en.

Karen i tanim na lukim pren bilong em Jessica i holim 2-pela botol em nau tasol ol i bin opim. Em i luksave olsem ol bia botol. Jessica i givim wanpela botol long Karen na em i tok, “Yu no liklik pikinini moa, yu ken kisim sampela amamas, a?”

Karen i laik tok nogat, tasol em i tingim olsem Jessica i pren bilong em. Na Karen i no laik bai pren bilong em i ting em i boring. Na tu, Jessica em gutpela meri. Olsem na sapos Jessica i dring, ating i no gat rong long mekim olsem. Karen i tokim em yet, ‘Em wanpela dring tasol. I no olsem mi kisim drak.’

Sapos samting i painim Karen i kamap long yu, bai yu mekim wanem?

Bilong yu ken mekim gutpela disisen long kain taim olsem, yu mas save long yu wanem kain man o meri. Dispela i makim olsem yu save long pasin, tingting, na bilip bilong yu. Taim yu save gut long yu yet, yu bai gat strong long kontrolim laip bilong yu na yu no larim ol narapela i kontrolim yu.​—1 Korin 9:26, 27.

Hau yu inap kisim kain pasin bilong bosim gut bel na tingting? Bilong helpim yu, yu ken bekim dispela 4-pela askim.

Taim yu save gut long ol samting yu gat save long mekim na ol gutpela pasin bilong yu, dispela bai strongim pasin bilong yu long bilip long yu yet.

EKSAMPEL LONG BAIBEL: Aposel Pol i tok: “Maski sapos mi no save tumas long pasin bilong autim ol tok, save bilong mi i no sot liklik.” (2 Korin 11:6) Pol i save gut long ol tok bilong Rait Holi, olsem na em i sanap strong taim ol narapela i salensim em. Em i no larim ol tok kranki bilong ol narapela i daunim em.​—2 Korin 10:10; 11:5.

SKELIM YU YET: Long daunbilo, raitim wanpela save yu gat long mekim wanpela wok samting.

Raitim wanpela gutpela pasin bilong yu. (Olsem, yu save tingim ol narapela? Yu redi long givim ol samting long ol narapela? Yu save mekim gut ol wok? Yu save bihainim gut taim?)

Sapos i gat wanpela baklain i strong, tasol wanpela hap bilong en i bruk liklik, orait baklain olgeta i no gat strong na inap bruk kwiktaim. Olsem tasol, sapos yu larim ol pasin kranki bilong yu i kontrolim laip bilong yu, em bai bagarapim ol gutpela pasin bilong yu.

EKSAMPEL LONG BAIBEL: Pol i luksave long ol pasin kranki bilong em. Em i tok: “Long bel bilong mi, mi laikim tumas lo bilong God. Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.”​—Rom 7:22, 23.

SKELIM YU YET: Wanem ol pasin kranki bilong yu em yu mas lain long kontrolim?

Yu ting bai yu kalap long teksi na tokim draiva long raunim raunim wanpela hap inap long petrol i pinis? Em longlong pasin na bai yu tromoi bikpela mani stret!

Olsem tasol, ol mak yu putim i mekim na laip bilong yu i gat mining bilong en. Yu save long hap yu laik go long en na rot yu mas bihainim.

EKSAMPEL LONG BAIBEL: Pol i tok: “Mi mekim olsem man i ran strong na i no lukluk nabaut.” (1 Korin 9:26) Pol i no stap nating tasol na bihainim wanem ol samting i kamap long laip bilong em, em i putim ol mak na wok strong long winim ol dispela mak.​—Filipai 3:12-14.

SKELIM YU YET: Long daunbilo, raitim 3-pela mak yu laik winim long neks yia.

Sapos yu no gat ol samting yu bilip strong long en, bai yu gat tupela tingting long ol disisen yu mekim. Na olsem wanpela palai i save senisim senisim kala bilong en, oltaim bai yu senisim ol pasin bilong yu bilong kamap wankain olsem ol wanlain bilong yu—dispela i makim olsem yu no save gut long yu wanem kain man o meri.

Tasol sapos ol samting yu bilip long en i stiaim ol pasin bilong yu, orait bai yu bihainim ol pasin tru bilong yu yet, maski ol arapela i bihainim ol narapela pasin.

EKSAMPEL LONG BAIBEL: Tingim profet Daniel, ating taim em i tineja yet em i tingting strong long bihainim ol lo bilong God, maski em i stap longwe long famili bilong em. (Daniel 1:8) Taim em i mekim olsem, em i bihainim ol pasin tru bilong em yet. Daniel i mekim ol pasin i stret wantaim bilip bilong em.

SKELIM YU YET: Yu gat wanem ol bilip? Olsem: Yu bilip long God? Wai na yu bilip olsem? Wanem samting i helpim yu long bilip olsem God i stap tru?

Yu bilip olsem ol stretpela lo bilong God i bilong lukautim yu? Wai na yu bilip olsem?

Yu laik stap olsem wanem? Yu laik stap olsem lip i pundaun na win i sakim i go i kam o yu laik stap olsem diwai i stap strong maski i gat bikpela win na ren? Strongim ol pasin tru bilong yu yet, na bai yu stap olsem dispela diwai. Na dispela bai helpim yu long bekim dispela askim, Mi Wanem Kain Man o Meri?