Tingim dispela: Tim i wok long pilai wantaim ol pren bilong em, na em i tromoi bal na nau bal i go pundaun antap long glas bilong kar bilong ol neiba na glas i bruk.

Sapos yu Tim, bai yu mekim wanem?

YU KEN MEKIM 3-PELA SAMTING:

1. Ranawe.

2. Bleimim ol narapela.

3. Tokim neiba long samting i kamap, na tok olsem yu bai givim mani bilong stretim.

Ating bai yu tingting long mekim Namba 1 samting. Tasol i gat as na yu mas tokaut long ol popaia bilong yu—maski yu brukim glas bilong kar o mekim sampela narapela popaia.

1. Em rait samting long mekim.

   Baibel i tok: “Olgeta samting mipela i mekim, mipela i laik wokabaut stret.”​—Hibru 13:18.

2. Ol manmeri bai redi long fogivim ol lain husat i save onest na tokaut long popaia bilong ol.

   Baibel i tok: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.”​—Sindaun 28:13.

3. Bikpela samting, dispela i amamasim God.

   Baibel i tok: “Jehova i save heitim man bilong mekim pasin giaman, tasol em i save pas gut wantaim ol man i save mekim stretpela pasin.”​—Sindaun 3:32, NW.

Karina i gat 20 krismas i bin spitim kar na polis i sasim em, na em i bin haitim tru dispela samting long papa bilong em. Tasol em i no inap haitim moa. Karina i tok: “Long yia bihain, Papa i lukim risit i gat nem bilong mi long en. Mi stap long bikpela trabol!”

Em i lainim wanem samting? Karina i tok: “Taim yu haitim ol popaia, dispela i mekim ol samting i go nogut moa. Bihain yu bai kisim yet hevi bilong dispela pasin!”

Baibel i tok: “Planti taim yumi olgeta i save popaia.” (Jems 3:2) Taim yu tokaut hariap long ol popaia bilong yu, dispela i soim olsem yu gat pasin daun na yu kamap olsem man i bikpela pinis long tingting.

Narapela samting em olsem, yu mas lain long ol popaia bilong yu. Wanpela gel, nem bilong em Vera, i tok: “Mi lain long olgeta popaia bilong mi na dispela i helpim mi long kamap gutpela meri na long mekim gut ol samting neks taim.” Yumi ken stori long hau yu inap mekim olsem.

Yu boroim baisikol bilong bikbrata bilong yu na yu bagarapim. Bai yu mekim wanem?

• Yu pasim maus tasol na yu laik tru olsem em i no ken lukim dispela samting.

• Tokim em long samting i bin kamap.

• Tokim em long samting i bin kamap, tasol bleimim ol narapela long dispela.

Yu feilim wanpela tes bikos yu no bin stadi. Bai yu mekim wanem?

• Bleimim dispela tes.

• Tokaut olsem em asua bilong yu yet, bikos yu no bin stadi.

• Sutim tok olsem tisa i kros long yu na em i feilim yu.

 Nau skelim dispela 2-pela samting yumi stori long en na traim long putim yu yet long ples bilong (1) bikbrata bilong yu, na (2) tisa bilong yu. Brata bilong yu na tisa bilong yu bai i gat wanem tingting long yu sapos yu bin tokaut long popaia bilong yu? Ol bai gat wanem tingting long yu sapos yu haitim popaia bilong yu?

Nau tingim wanpela popaia yu bin mekim las yia, na bekim ol dispela askim.

Wanem dispela popaia? Yu bin mekim wanem samting long stretim dispela popaia?

• Mi bin haitim.

• Mi bin bleimim ol narapela.

• Mi bin tokaut.

Sapos yu no bin tokaut long popaia bilong yu, bihain yu pilim olsem wanem?

• Gutpela tru—i no gat wanpela i save!

• Gilti—i gutpela sapos mi bin tokaut.

Long dispela taim yet, yu inap mekim wanem samting bilong stretim hevi?

Yu lainim wanem samting long popaia bilong yu?

Wai na sampela man i no save tokaut long popaia bilong ol?

Ol man bai i gat wanem tingting long yu sapos oltaim yu traim long karamapim ol popaia bilong yu? Na ol bai i gat wanem tingting long yu sapos yu save tokaut long ol popaia bilong yu?​—Luk 16:10.