Tingim dispela: Taim Julia i lukluk long mira, oltaim em i lukim em yet olsem em i pat. Em i tokim em yet, “Mi mas lus weit,” tasol papamama na ol pren bilong em i lukim olsem em i “bun nating stret.”

I no longtaim i go pinis, Julia i tingting long mekim wanpela narakain samting bilong lusim weit inap 2 kilogram tasol. Em i laik tambu long kaikai inap sampela de . . .

Sapos yu pilim wankain olsem Julia, bai yu mekim wanem?

I no gat rong long tingim lukluk bilong yu. Baibel i mekim gutpela tok long sampela man na meri em ol i bin gat gutpela skin tru olsem Sara, Resel, Abigel, Josep, na Devit. Baibel i tok long wanpela meri, nem bilong em Abisak olsem em i “naispela meri tru.”​—1 King 1:4.

Tasol planti yangpela long nau i tingting oltaim long lukluk bilong ol. Dispela pasin inap kamapim bikpela hevi tru. Tingim:

• Long wanpela wok painimaut, 58 pesen bilong ol gels i tok ol i pat tumas, tasol tru tru, 17 pesen tasol i pat.

• Long narapela wok painimaut, 45 pesen bilong ol meri em weit bilong ol i aninit tru long nomol mak, ol i ting olsem ol i pat na hevi tumas!

• Pasin bilong wok strong long lus weit i mekim na sampela i kisim sik anoreksia we ol i kaikai liklik tru o tambu olgeta long kaikai. Sik anoreksia inap kilim man i dai.

 Sapos yu gat ol mak bilong sik anoreksia o ol narapela sik we yu no kaikai gut, orait kisim helpim. I gutpela yu toktok wantaim papamama o wanpela man o meri i bikpela pinis. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.”​—Sindaun 17:17.

Tru tru, pasin bilong man em i bikpela samting na inap mekim ol narapela i laikim em o nogat. Tingim Apsalom, pikinini bilong King Devit. Baibel i tok:

“Apsalom i naispela man tru, na bodi bilong en i no gat wanpela mak bilong sua samting i stap long en. . . , olsem na ol Israel i save amamas moa yet long lukim em.”​—2 Samuel 14:25.

Tasol dispela yangpela man i gat pasin antap, oltaim em i laik stap nambawan, na em i laik daunim king! Olsem na Baibel i no mekim ol gutpela tok long em. Baibel i stori long em olsem man i no save sem liklik, i no save stap gut long narapela, na tingting tasol long bagarapim ol arapela.

I gat as na Baibel i givim dispela edvais olsem:

“Yupela i mas werim nupela pasin olsem yupela i werim klos.”​—Kolosi 3:10.

“Yupela i no ken bilasim skin ausait tasol, . . . Nogat. Bikpela samting . . . yupela i bilasim insait bilong yupela long pasin isi na bel isi, ol i olsem bilas i no inap bagarap.”​—1 Pita 3:3, 4.

I no gat rong long tingting long luk nais, tasol pasin bilong yu i bikpela samting moa winim lukluk bilong yu. Long laip olgeta bilong yu, ol gutpela pasin bilong yu bai mekim ol narapela i laikim yu, na i no gutpela bodi bilong yu o lukluk bilong yu! Wanpela gel nem bilong em Phylicia i tok: “Naispela lukluk bilong yu inap pulim ai bilong ol narapela hariap tru, tasol yu wanem kain man o meri tru na ol gutpela pasin bilong yu em samting ol narapela bai tingim inap oltaim.”

Planti taim yu no save amamas long lukluk bilong yu?

Yu save tingting long putim sampela kain marasin long skin o tambu long kaikai bilong stretim sampela hap bilong bodi bilong yu i no luk gut?

Sapos yu inap senisim sampela samting long lukluk bilong yu, wanem samting tru yu laik senisim? (Sekolim ol tok daunbilo em yu laik senisim.)

• HAIT

• WEIT

• GRAS

• BODI SEIP

• PES

• SKIN KALA

Sapos yu tok yes long tupela askim i stap antap na yu sekolim 3-pela o moa tok long namba 3 askim, orait tingim dispela: Yu ting olsem lukluk bilong yu i no gutpela, tasol i gat as na yu ken save tru olsem ol narapela i no gat kain tingting olsem long yu. Em i isi long kisim tingting kranki na wari olsem yu no luk gut liklik.​—1 Samuel 16:7.