Pasin bilong rausim man i mekim rong na i no tanim bel, dispela i save lukautim kongrigesen na stretim dispela man. (1Ko 5:6, 11) Yumi soim pasin laikim taim yumi sapotim disisen bilong Jehova long stretim man. Pasin bilong rausim man long kongrigesen i save givim pen long ol wanblut bilong man i raus na ol brata i insait long komiti bilong harim kot. Tasol taim yumi sapotim dispela disisen, olsem wanem dispela i soim olsem yumi gat pasin laikim?

Bikpela samting, taim yumi mekim olsem, yumi soim olsem yumi tingim nem bilong Jehova na pasin holi bilong em. (1Pi 1:14-16) Na tu, taim yumi mekim olsem, yumi soim pasin laikim long man i raus. Taim wanpela i stretim yumi, dispela inap mekim yumi bel hevi, tasol “dispela i save kamapim bel isi na stretpela pasin.” (Hi 12:5, 6, 11) Sapos yumi bung wantaim wanpela i raus o wanpela i rausim em yet, yumi pasim Jehova long mekim wok bilong em. Tingim, Jehova i save stretim lain bilong em “inap long mak i stret long ol.” (Jer 30:11) Yumi laik bai man i raus i ken kam bek long Papa bilong yumi i gat pasin marimari. Olsem na yumi wok yet long sapotim rot Jehova i mekim bilong stretim man, na yumi bai mekim olgeta samting bilong pas gut yet wantaim Jehova.—Ai 1:16-18; 55:7.

LUKIM VIDIO STAP GUT LONG JEHOVA WANPELA TASOL, NA BIHAIN BEKIM OL DISPELA ASKIM:

• Papamama Kristen i save pilim olsem wanem taim pikinini i lusim Jehova?

• Ol bratasista i ken mekim wanem bilong helpim famili bilong wanpela i raus?

• Wanem stori bilong Baibel i kamapim klia olsem em i bikpela samting long i stap gut long Jehova winim pasin bilong i stap gut long wanblut?

• Yumi ken mekim wanem bilong i stap gut long Jehova winim pasin bilong i stap gut long wanfamili?