Kirap long dispela yia, yumi bai i gat bikpela haptaim long redi long Memorial bilong tingim indai bilong Krais. Sapos Memorial i kamap namel long wik, bai i no gat Miting Bilong Laip na Wok Autim Tok long dispela wik. Sapos Memorial i kamap long wiken, bai i no gat pablik tok na Wastaua Stadi. Olsem wanem? Bai yu mekim gutpela wok long dispela haptaim we i no gat miting? Wankain olsem long taim bilong ol aposel, yumi mas stretim ol samting bilong redi long dispela spesel bung. (Lu 22:7-13; km 3/15 1) Tasol yumi olgeta i mas redim bel bilong yumi. Olsem wanem yumi inap mekim olsem?

• Tingim as na em i bikpela samting long i go long dispela bung.—1Ko 11:23-26

• Beten na tingim gut pasin bilong yu long pas gut wantaim Jehova.—1Ko 11:27-29; 2Ko 13:5

• Ritim na tingim tingim long bel ol tok bilong Baibel we i stori long mining bilong Memorial.—Jon 3:16; 15:13

Sampela pablisa i save ritim na tingim tingim long bel Baibel ritim bilong Memorial i stap long buklet Skelim Sampela Tok Bilong Baibel Long Olgeta De. Sampela i save ritim ol Baibel skripsa i stap long dispela sat i stap daunbilo. Sampela narapela i save mekim riviu long ol atikol i stap long Wastaua i stori long Memorial na pasin laikim bilong Jehova na Jisas em tupela i bin soim long yumi. Maski yu bihainim wanem pasin bilong stadi, em i ken mekim yu i go klostu moa long Jehova na Pikinini bilong em.