Jisas i tok: “Yupela i kisim fri, olsem na yupela i mas givim fri.” (Mt 10:8) Yumi bihainim dispela tok taim yumi no askim ol man long baim Baibel o ol litresa bilong yumi. (2Ko 2:17) Tasol ol dispela pablikesen i gat ol gutpela tok i tru bilong God. Ol i save tromoi bikpela strong na mani bilong prinim na salim ol litresa i go long ol kongrigesen long olgeta hap. Olsem na yumi mas kisim inap tasol long skel bilong yumi.

Skelim gut taim yu laik givim litresa long ol man, maski yu autim tok long pablik ples. (Mt 7:6) No ken givim nating litresa long ol man i wokabaut i go kam. Traim bes long toktok wantaim ol na lukim sapos ol i gat intres. Yu ting yu inap tok yes long wanpela bilong ol dispela askim i stap long blok? Sapos yu hatwok long luksave olsem man i gat intres o nogat, i gutpela long givim em liklik nius. Sapos em i askim long wanpela magasin o narapela pablikesen, yumi ken givim wanpela kopi long em.—Sd 3:27, 28.