BIHAINIM PASIN KRISTEN
Mekim Wok Autim Tok i Kamap Gutpela Moa—Stop Long Stadi Wantaim Ol Baibel Stadi i No Mekim Ol Senis
BILONG WANEM EM I BIKPELA SAMTING: Ol man i mas singaut long nem bilong Jehova na bai em i ken kisim bek ol. (Ro 10:13, 14) Tasol i no olgeta man i stadi long Baibel i laik bihainim ol lo bilong Jehova. Yumi yusim gut taim bilong yumi long autim tok taim yumi helpim ol man i laik tru long mekim ol senis long laip bilong ol bilong amamasim Jehova. Sapos yumi stadi wantaim wanpela Baibel sumatin longpela taim na em i no mekim ol senis, orait mobeta yumi stop long stadi wantaim em na yusim taim bilong yumi long helpim ol arapela em Jehova i kirapim ol long kam long em na oganaisesen bilong em. (Jon 6:44) Bihain sapos em i mekim sampela senis na i soim olsem ‘bel bilong em i gutpela long kisim laip oltaim,’ orait yumi ken kirap gen long stadi wantaim em.—Ap 13:48.
ROT BILONG MEKIM:
-
Tok amamas long sumatin i laik kisim stretpela save.—1Ti 2:4
-
Kamapim klia olsem em i bikpela samting long em i mas bihainim ol samting em i lainim.—Lu 6:46-49
-
Long gutpela pasin stori wantaim em long tok piksa bilong Jisas long man bilong planim ol sid na askim em long skelim wanem ol samting i pasim em long mekim ol senis long laip bilong em.—Mt 13:18-23
-
Long gutpela pasin stori gut long as na yu no inap stadi moa wantaim em
-
Tokim em olsem yu bai kam visitim em sampela taim bilong strongim em na bihain sapos em i mekim ol senis, orait yutupela bai kirap gen long stadi
LUKIM VIDIO, NA BIHAIN GIVIM OL DISPELA ASKIM:
-
Yu lainim wanem samting long toktok i kamap namel long ol we i soim olsem sumatin i no kamap strong long sait bilong bilip?
-
Olsem wanem pablisa i helpim sumatin long luksave olsem em i mas mekim sampela senis long laip bilong em?
-
Pablisa i mekim wanem bilong helpim sumatin long save olsem em i redi long stadi gen wantaim em long bihain, sapos sumatin i redi long mekim olsem?