Tingim olsem yu stap long Galili long taim bilong Jisas. Yu go long Jerusalem bilong selebretim Ol Bikpela De Bilong i Stap Long Haus Win. Taun i pulap tru long ol wanbilip husat i kam long ol longwe ples. Yu laik givim ofa long Jehova. Olsem na yu kisim wanpela meme na wokabaut namel long strit bilong siti we i pulap tru long ol manmeri husat i go long tempel bilong givim ofa. Taim yu kamap, tempel i pulap tru. Nau em taim bilong yu long givim meme bilong yu i go long pris. Long dispela taim stret, yu tingim brata bilong yu husat i stap namel long planti lain manmeri o insait long taun na em i gat tok long yu. Jisas i stori gut long samting yu mas mekim. (Ritim Matyu 5:24.) Olsem wanem yu na brata bilong yu husat i gat tok long yu inap bihainim tok bilong Jisas long stretim hevi na kamap wanbel gen? Long lista daunbilo, putim tik klostu long bekim i stret.

YU MAS . . .

• toktok wantaim brata bilong yu sapos yu ting olsem i gat gutpela risen na em i bel hevi

• traim long stretim tingting bilong brata bilong yu sapos yu pilim olsem em i gat pasin bilong belhat kwik o bel hevi kwik na em tu i gat asua long hevi i kamap

• putim yau gut taim brata bilong yu i kamapim tingting bilong em, na maski yu no kliagut long risen na em i bel hevi, orait yu mas tok sori long ol pasin yu mekim we yu no min tasol i mekim em i bel hevi

BRATA BILONG YU I MAS . . .

• kisim helpim long ol narapela insait long kongrigesen, na tokim ol long olsem wanem pasin bilong yu i mekim em i bel hevi

• toktok strong long yu, tokaut long olgeta liklik samting yu mekim, na em i laik bai yu tokaut olsem em asua bilong yu

• luksave long pasin daun na pasin bilong yu long strongim bel long i go toktok wantaim em, na pasin bilong yu long fogivim em long bel olgeta

Long nau, yumi no save givim animal olsem sakrifais bilong lusim rong. Jisas i laik skulim yumi long wanem samting taim em i stori long pasin bilong i stap wanbel wantaim ol bratasista husat i rongim yumi, na wok lotu em God i orait long en?