Bilong wanem yumi save amamas long ol kibung i save kamap? Wankain olsem long Israel long bipo, ol kibung long nau i save opim rot bilong yumi long bung wantaim planti handet wanbilip bilong yumi na lotuim Jehova. Yumi amamas long kisim ol tok i helpim yumi long pas gut wantaim Jehova. Yumi amamas tu long bung wantaim ol pren na famili bilong yumi. Yumi tenkyu tru long Jehova na dispela i kirapim yumi long go long 3-pela de bilong kibung.

Taim yumi bung wantaim, yumi no ken tingting tasol long ol samting yumi inap kisim, nogat, yumi mas tingim tu olsem wanem yumi ken soim pasin laikim long ol arapela. (Ga 6:10; Hi 10:24, 25) Taim yumi opim dua bilong brata o sista bilong yumi o yumi makim tasol sia bilong yumi long sindaun na yumi no makim planti sia, yumi soim olsem yumi tingim ol arapela. (Fl 2:3, 4) Ol kibung i opim rot long yumi bungim ol nupela pren. Paslain long program na bihain long en na long taim bilong belo, yumi ken putim mak long bungim wanpela em yumi no save long em. (2Ko 6:13) Ol bratasista yumi bungim long ol dispela kibung inap stap pren bilong yumi inap oltaim! Na bikpela samting moa, taim ol man i lukim pasin laikim i stap namel long yumi, dispela bai kirapim ol long bung wantaim yumi long lotuim Jehova.—Jon 13:35.

LUKIM VIDIO “PASIN LAIKIM I NO INAP PINIS”! OL INTENESENEL KIBUNG, NA BIHAIN GIVIM OL DISPELA ASKIM:

• Olsem wanem ol bratasista i soim pasin laikim long ol arapela bratasista i kam long ol intenesenel kibung long 2019?

• Olsem wanem pasin laikim na pasin wanbel i stap namel long ol manmeri bilong Jehova i narapela kain?

• Ol memba bilong Gavening Bodi i stori olsem wanem long pasin laikim Kristen?

• Olsem wanem pasin laikim i stap namel long ol bratasista long Jemani i mekim ol i stap wanbel? Na olsem wanem pasin laikim i stap namel long ol bratasista long Saut Korea i mekim ol i stap wanbel?

• Yumi mas tingting strong long mekim wanem?