Yu karim wanem ol hevi long olgeta de? Olsem wanem? Yu wanpela papa na yu gat planti wok? Yu wanpela wanpis mama o papa na yu taitim bun long lukautim famili bilong yu? Yu wanpela yangpela i stap long skul na ol wanskul i subim yu long mekim sampela pasin i no stret? Yu gat sik o yu karim hevi bilong i go lapun? Yumi olgeta i karim sampela hevi. Planti bratasista i bungim planti hevi long wankain taim. Tasol yumi save olsem klostu nau Jehova bai pinisim ol dispela hevi.—2Ko 4:16-18.

Taim yumi wet long dispela, bel bilong yumi i stap isi bikos yumi save olsem Jehova i save long ol hevi yumi karim, em i tingim pasin bilong yumi long stap gut long em na sanap strong na karim ol hevi, na em bai blesing yumi long bihain. (Jer 29:11, 12) Jisas tu i tingim tru yumi. Taim yumi inapim ol wok Kristen bilong yumi, yumi ken bilip tru olsem Jisas i tingim yumi bikos em i tok: “Mi stap wantaim yupela.” (Mt 28:20) Taim yumi tingim tingim long bel olsem long bihain aninit long Kingdom Bilong God yumi bai stap fri, yumi bai bilip na wet, na sanap strong na karim ol hevi long nau.—Ro 8:19-21.

LUKIM VIDIO TAIM BIKPELA WIN NA REN I WOK LONG KAM KLOSTU, LUKLUK I GO STRET LONG JISAS!—OL BLESING KINGDOM BAI KAMAPIM BIHAIN, NA BIHAIN BEKIM OL DISPELA ASKIM:

• Olsem wanem ol manmeri i stap longwe long God? Dispela i kamapim wanem samting?

• Long bihain wanem samting bai painim ol man i stap gut long Jehova?

• Olsem wanem yumi inap kisim ol dispela gutpela samting long bihain?

• Yu wet long lukim wanem ol blesing long nupela taim?