Yumi stap namel long ol manmeri we ol i tok gutpela pasin em i pasin nogut na pasin nogut em i gutpela pasin. (Ai 5:20) Sampela manmeri i save mekim ol pasin em Jehova i heitim, kain olsem ol man i slip wantaim ol man na ol meri i slip wantaim ol meri. Ol wanskul bilong ol pikinini bilong yu o ol arapela inap kirapim ol long bihainim pasin bilong ol. Olsem wanem yu inap redim ol pikinini bilong yu long sakim dispela pasin na ol arapela traim tu?

Skulim ol long ol lo bilong Jehova. (Wk 18:3) Taim ol i wok long kamap bikpela, skulim ol long ol tok Baibel i mekim long maritpasin na i stret wantaim krismas bilong ol. (Lo 6:7) Askim yu yet: ‘Mi skulim ol pikinini bilong mi long stretpela wei bilong soim pasin laikim? Mi stori long ol long as na em i bikpela samting long werim klos i no pulim ai bilong ol man? Na mi stori long as na ol narapela i no ken lukim sem bilong ol? Ol bai save long wanem samting ol i mas mekim sapos wanpela i laik soim ol ponografi o wanpela i askim ol long mekim wanpela pasin em Jehova i no orait long en?’ Sapos ol i save long ol pasin i stret, ol inap abrusim hevi. (Pr 27:12; Ekl 7:12) Taim yu skulim ol, yu soim olsem yu tenkyu long Jehova long dispela gutpela presen em i givim long yu.—Sg 127:3.

LUKIM VIDIO WOKIM HAUS BILONG SANAP STRONG—LUKAUTIM PIKININI BILONG YU LONG OL “PASIN NOGUT,” NA BIHAIN BEKIM OL DISPELA ASKIM:

• Bilong wanem sampela papamama i pilim hatwok long skulim ol pikinini bilong ol long ol samting bilong maritpasin?

• Bilong wanem ol papamama i mas skulim ol pikinini na “putim tingting bilong [Jehova] long bel bilong ol”?—Ef 6:4

• Oganaisesen bilong Jehova i givim wanem ol samting bilong helpim ol papamama long skulim ol pikinini long ol samting bilong maritpasin?—w19.05 12, blok

• Bilong wanem oltaim yu mas toktok wantaim ol pikinini bilong yu paslain long hevi i kamap?