Yumi laik amamasim Jehova long olgeta samting yumi mekim. (Pr 27:11) Bilong mekim olsem, yumi mas mekim disisen i stret wantaim tingting bilong God maski i no gat wanpela lo o tok stret bilong stiaim yumi. Wanem samting inap helpim yumi long mekim olsem?

Mekim Baibel stadi long olgeta taim. Taim yumi ritim Baibel, i olsem yumi lusim haptaim long stap wantaim Jehova. Yumi inap kisim save long tingting bilong Jehova taim yumi lukim samting em i mekim long ol manmeri bilong em, na taim yumi skelim stori bilong ol man i mekim gutpela pasin o pasin nogut long ai bilong em. Taim yumi laik mekim disisen, holi spirit inap helpim yumi long tingim bek ol skul na ol stiatok yumi bin kisim save long en long Baibel.​—Jon 14:26.

Mekim wok painimaut. Taim yu laik mekim wanpela disisen, askim yu yet, ‘Wanem ol ves o stori i stap long Baibel inap helpim mi long kliagut long tingting bilong Jehova long dispela samting?’ Beten askim Jehova long helpim yu, na yusim ol tul bilong mekim wok painimaut we i stap long tokples bilong yu long painim na bihainim ol stiatok bilong Baibel we inap helpim yu.​—Sg 25:4.

WATSIM VIDIO YUMI MAS “SANAP STRONG NA RAN LONG DISPELA RESIS”—KISIM GUTPELA KAIKAI, NA BIHAIN BEKIM OL DISPELA ASKIM:

• Yangpela sista long vidio i bungim wanem ol presa?

  Bekim Bilong Yu

• Hau bai yu inap yusim ol tul bilong mekim wok painimaut long helpim yu long karim ol wankain presa?

  Bekim Bilong Yu

• Taim yumi lusim haptaim long mekim wok painimaut na stadi bilong yumi yet, hau bai dispela i helpim yumi long mekim gutpela disisen?​—Hi 5:13, 14.

  Bekim Bilong Yu