BIHAINIM PASIN KRISTEN
Jehova i Helpim Yumi Long Karim Ol Hevi
Long dispela taim bilong las de, yumi bungim planti bikpela hevi. Sampela taim, yumi inap pilim olsem ol hevi i bikpela tumas na yumi no inap long karim. Tasol sapos yumi wok yet long go klostu long Jehova, em bai helpim yumi long sanap strong na karim ol bikpela hevi we i givim bikpela bel hevi long yumi. (Ai 43:2, 4) Hau bai yumi inap go klostu long Jehova long taim yumi karim ol hevi?
Beten. Taim yumi kamapim bel na tingting bilong yumi long Jehova long rot bilong beten, em bai givim yumi bel isi na strongim yumi long karim ol hevi.—Fl 4:6, 7; 1Te 5:17.
Ol miting. Yumi nidim moa yet ol tok bilong strongim bilip na pasin bilong bung wantaim em Jehova i givim long rot bilong ol miting. (Hi 10:24, 25) Taim yumi redim ol miting, go long ol miting, na insait long ol miting bilong kongrigesen, yumi bai kisim helpim long holi spirit bilong Jehova.—Re 2:29.
Wok autim tok. Sapos yumi bisi long mekim wok autim tok, em bai isi long yumi putim tingting i go long ol gutpela samting. Na tu, yumi bai strongim pasin pren bilong yumi wantaim Jehova na ol wanwok bilong yumi.—1Ko 3:5-10.
WATSIM VIDIO JEHOVA BAI KISIM YU OLSEM PIKININI BILONG EM, NA BIHAIN BEKIM OL DISPELA ASKIM:
-
Wanem samting i helpim Malu long stap klostu long Jehova taim ol hevi i painim em?
-
Olsem Malu, hau bai tok i stap long Buk Song 34:18 i mekim gut bel bilong yumi taim ol hevi i painim yumi?
-
Olsem wanem ekspiriens bilong Malu i soim olsem Jehova i save givim yumi “strong i winim strong bilong yumi ol man” long taim ol hevi i painim yumi?—2Ko 4:7.
