Yumi yusim gut strong bilong yumi taim yumi putim mak long winim ol mak bilong bilip. (1Ko 9:26) Taim yumi putim ol mak yumi laik winim, dispela bai helpim yumi long yusim gut taim paslain long dispela haptaim bilong nau i pinis. (Ef 5:15, 16) Long taim bilong famili lotu, putim ol mak yu laik winim long nupela sevis yia. Bilong helpim yu, dispela miting wok buk i gat ol atikol i stori long sampela mak yu ken putim bihain long yu beten na skelim gut ol samting.​—Jem 1:5.

Olsem, olgeta long famili inap toktok gut wantaim na larim wanpela long kamap painia oltaim. Sapos yu no ting yu inap kisim aua em ol painia i mas kisim, toktok wantaim sampela painia husat i gat wankain sindaun olsem yu. (Pr 15:22) Ating long taim bilong famili lotu, yu ken mekim intaviu long wanpela painia. Bihain raitim sampela sediul yu inap bihainim. Sapos yu mekim wok painia long bipo, skelim sapos i stap bilong yu long nau i opim rot long yu inap mekim olsem.

Sampela long famili bilong yu inap mekim wok painia insait long wanpela o sampela mun? Sapos yu no gat bikpela strong, yu inap mekim painia haptaim long rot bilong lusim sampela hap taim long wan wan de long autim tok. Sapos yu no gat bikpela taim namel long wik bikos yu wok fultaim o yu go long skul, yu ken makim wanpela mun i gat holide o 5-pela wiken. Long kalenda, makim wanem mun yu laik mekim painia haptaim na raitim sediul bilong yu.​—Pr 21:5.

WATSIM VIDIO MAS STRONGIM BEL . . . YUPELA PAINIA, NA BIHAIN BEKIM OL DISPELA ASKIM:

• Stori bilong Sista Aamand i givim wanem skul long yumi long hau Jehova i save laikim na tingim ol lain i daunim sampela laik bilong ol long mekim wok painia?