Long olgeta yia yumi save wok strong long singautim ol manmeri long teritori bilong yumi long kam bung wantaim yumi bilong mekim Memorial. Planti bilong ol dispela manmeri em yumi no save long ol. Yumi mas singautim tu ol lain em yumi save long ol. Ol lain i kisim invatesen, ol i save kam. (yb08-E 11 par. 3; 14 par. 1) Yu ken singautim husat long kam?

• Ol wanblut

• Ol wanwok na ol wanskul

• Ol neiba

• Ol gobek na ol Baibel sumatin em nau yu stadi wantaim ol na ol arapela em bipo yu bin stadi wantaim ol

Na tu, ol elda bai singautim ol pablisa i lusim wok autim tok longpela taim long kam long Memorial. Olsem wanem sapos wanpela em yu singautim i no stap long hap bilong yu? Yu ken go long jw.org, na klik long MIPELA OL WITNES, na klik long “Memorial Bilong Dai Bilong Jisas,” na painimaut taim na ples we Memorial bai kamap klostu long hap bilong em. Taim yu redim ol samting bilong Memorial bilong dispela yia, tingim ol lain bai yu singautim i kam, na givim invatesen long ol.