Laspela Pasova Jisas i mekim i bikpela samting. Klostu nau em bai dai, olsem na em i laik kisim kaikai bilong Pasova wantaim ol aposel na kamapim nupela bung em ol bai mekim long olgeta yia, em Kaikai Bilong Bikpela. So em i salim Pita na Jon i go redim rum bilong mekim dispela bung. (Lu 22:7-13; lukim piksa long fran pes.) Dispela i kirapim yumi long yumi tu i mas redim ol samting bilong Memorial bai kamap long Mas 27. Olgeta kongrigesen i mas makim man bilong mekim tok, redim bret na wain, na ol arapela samting. Tasol yumi ken mekim wanem bilong redi long Memorial?

Redim bel bilong yu. Mekim Baibel ritim bilong Memorial na tingim tingim long bel. Yu inap lukim sediul bilong Baibel ritim bilong Memorial i stap long buklet Skelim Sampela Tok Bilong Baibel Long Olgeta De. Apendiks B12 bilong Baibel Nupela Taim Trenslesen Bilong Ol Skripsa Holi i gat sediul bilong Baibel ritim. (Lukim tu Kristen Laip na Wok Autim Tok Miting Wok Buk bilong Epril 2020.) Ol famili i ken sekim Watch Tower Publications Index o Stadi Indeks Bilong Ol Witnes Bilong Jehova na mekim wok painimaut long olsem wanem pe bilong baim bek man i bikpela samting na skelim dispela long taim bilong famili lotu.

Singautim ol man i kam. Yu ken insait long wok bilong singautim ol man i kam long Memorial. Tingim lain yu inap singautim, kain olsem ol gobek, lain yu stadi wantaim ol long bipo, ol pren, na ol wanblut. Ol elda i mas singautim ol bratasista em ol i lusim wok autim tok longpela taim. Sapos wanpela yu singautim i no stap long hap yu stap long en, yu ken painimaut taim na ples em Memorial bai kamap long hap klostu long em long jw.org. Long hom pes klik long MIPELA OL WITNES na klik long “Memorial Bilong Dai Bilong Jisas.”

Wanem samting moa yumi ken mekim bilong redi long Memorial?