Ol disasta em win na ren samting i kamapim i go bikpela long nau. Taim disasta i kamap, i gat nid long stretim na lukautim gut rilif wok. Em risen na Gavening Bodi i stretim rot long kamapim ol Disasta Rilif Dipatmen long olgeta brens ofis.

Taim ol brata long dispela dipatmen i harim olsem i gat disasta, kwiktaim ol i toktok wantaim ol elda long dispela hap bilong painimaut long helpim ol pablisa i nidim. Sapos hevi i bikpela na ol pablisa long dispela hap yet i no inap long stretim, brens bai salim ol brata husat i winim ol mak bilong bilip long i go pas long rilif wok. Ol dispela brata i ken askim long sampela volantia o donesen bilong baim sampela samting we ol pablisa i nidim, o ol inap long baim na skelim ol samting long dispela hap yet.

Planti gutpela samting i kamap taim ol i mekim olsem. Taim ol brata yet i go pas long mekim wok, bai i no gat planti wok tumas, ol bai save long hau wok i kamap, na ol bai yusim gut mani na ol samting ol i kisim.

Ol brata em brens i makim inap makim hamas mani na volantia ol bai nidim long mekim dispela rilif wok. Na tu, ol i ken toktok wantaim ol wokman husat i go pas long lukautim hap disasta i kamap long en, planti taim ol bai helpim yumi long hariap long mekim rilif wok. So wan wan yet i no ken kisim mani, salim ol rilif saplai, o go long hap disasta i kamap long en, nogat, ol i ken mekim olsem sapos ol brata i askim ol long helpim.

Maski i olsem, taim disasta i kamap, yumi helpim ol arapela. (Hib 13:16) Yumi laikim ol bratasista bilong yumi! Bai yumi mekim wanem? Bikpela samting moa em yumi ken beten long ol lain i karim hevi long disasta na ol lain i mekim rilif wok. Na tu, yumi ken givim mani bilong helpim wok i kamap long olgeta hap bilong graun. Wantaim helpim bilong Gavening Bodi, ol brens ofis bai skelim ol bai yusim dispela mani long mekim wanem wok. Na sapos yumi yet i laik givim helpim, yumi ken pulimapim Local Design/Construction Volunteer Application (DC-50) bilong soim olsem yumi redi long helpim.

LUKIM VIDIO TAIT WARA I KAMAPIM BAGARAP LONG BRASIL, NA BEKIM DISEPLA ASKIM:

Bihain long tait wara i kamap long Brasil long 2020, yu laikim wanem ol samting long rilif wok bilong ol Witnes Bilong Jehova?