Klostu nau pasin bilong Jehova long i no les kwik long dispela haptaim bilong nau bai pinis. Lotu giaman bai bagarap, ol kantri bai bung long pait long lain bilong God, na Jehova bai bagarapim ol man nogut long Armagedon. Ol Kristen i luk fowed long lukim ol dispela samting bai kamap.

Em tru olsem yumi no save long olgeta samting bai kamap long taim bilong traipela hevi. Olsem, yumi no save em bai kirap long wanem taim stret. Yumi no save ol gavman bai yusim wanem ol risen stret long pait long ol lotu. Yumi no save dispela pasin birua ol kantri bai kamapim long lain bilong God bai stap inap wanem taim o wanem ol samting bai kamap. Na tu, yumi no save Jehova bai mekim wanem stret bilong bagarapim ol man nogut long Armagedon.

Tasol Baibel i givim yumi olgeta tok yumi nidim na bai yumi inap strongim bel na wet long lukim ol samting i kamap long bihain. Olsem, yumi save yumi stap long pinis bilong dispela taim bilong “las de.” (2 Ti 3:1) Yumi save olsem God bai “sotim” dispela taim we pasin birua bai painim ol lotu na bai lotu i tru i no ken bagarap. (Mt 24:22) Yumi save olsem Jehova bai lukautim lain bilong em. (2Pi 2:9) Na yumi save olsem Man em Jehova i makim long bagarapim ol man nogut na lukautim bikpela lain manmeri long Armagedon, em i gat bikpela strong na em bai mekim stretpela pasin.​—Re 19:11, 15, 16.

Ol samting bai kamap bihain bai mekim ol manmeri i ‘pret na airaun.’ Tasol long rot bilong ritim na tingim tingim ol samting Jehova i mekim long seivim lain bilong em long bipo na ol samting em i tok long mekim long bihain, yumi inap “sanap na litimapim het” bilong yumi na bilip olsem taim bilong God long kisim bek yumi i klostu.​—Lu 21:26, 28.