RISEN: Baibel sumatin i mas dediket long Jehova na kisim baptais bambai Jehova i ken orait long em. (1Pi 3:21) God bai lukautim ol manmeri husat i bihainim tok promis bilong ol taim ol i dediket. (Sg 91:1, 2) Taim Kristen i dediket, em i dediket long Jehova—em i no dediket long man, wok, o wanpela oganaisesen. Olsem na sumatin i mas kisim pasin bilong laikim God na pilim tru ol pasin bilong em.—Ro 14:7, 8.

ROT BILONG MEKIM:

• Taim yupela i stadi, stori long samting yupela i stadi long en i kamapim klia wanem ol pasin bilong Jehova. Kamapim klia olsem em i bikpela samting long sumatin i mas ritim Baibel long olgeta de na “beten oltaim” long Jehova.—1Te 5:17; Jem 4:8

• Kirapim sumatin long putim mak long dediket na kisim baptais. Na tu, helpim em long putim mak long bekim tok long miting, na autim tok long ol neiba na ol wanwok. Tingim, Jehova i no save fosim man long mekim wok bilong em. Wan wan man yet i mas mekim disisen olsem em i laik dediket long God o nogat.—Lo 30:19, 20

• Kirapim sumatin long mekim sampela senis long laip bilong em bambai Jehova i ken belgut long em, na em inap kisim baptais. (Sd 27:11) Sapos sumatin i hatwok long lusim sampela pasin kranki, orait wok yet long helpim em long rausim olpela pasin na kisim nupela pasin. (Ef 4:22-24) Stori wantaim sumatin long ol atikol bilong seksen, “Baibel i Save Senisim i Stap Bilong Man,” long ol Wastaua

• Stori long sumatin long amamas yu kisim taim yu mekim wok bilong Jehova.—Ai 48:17, 18