Taim meri bilong Lot i ranawe lusim Sodom, bilong wanem em i lukluk i go bek? Baibel i no kolim risen na em i mekim olsem. (St 19:17, 26) Tok lukaut bilong Jisas i soim olsem ating em i laikim tru ol samting em i bin lusim. (Lu 17:31, 32) Yumi inap mekim wanem na God i no orait moa long yumi wankain olsem meri bilong Lot? Yumi no ken larim pasin bilong kisim mani kago i stap namba 1 samting long laip bilong yumi. (Mt 6:33) Jisas i skulim yumi olsem yumi “no inap stap wokboi bilong God na mani wantaim.” (Mt 6:24) Tasol olsem wanem sapos yumi luksave olsem mani kago i pulim taim bilong yumi long mekim wok lotu? Yumi ken beten long Jehova long givim gutpela tingting na save na bai yumi gat strongpela bel long mekim ol senis we yumi mas mekim.

TINGIM GEN 3-PELA HAP BILONG VIDIO TINGIM MERI BILONG LOT, NA BEKIM OL DISPELA ASKIM:

• Olsem wanem laik bilong kisim planti mani i stiaim tingting, toktok, na pasin bilong Gloria?

• Olsem wanem eksampel bilong meri bilong Lot i stap olsem tok lukaut long yumi long nau?

• Olsem wanem pasin bilong bihainim ol stiatok bilong Baibel i helpim Joe na famili bilong em?

• Olsem wanem ol poroman bilong Anna long ples wok i mekim na em i no strong long bilip?

• Bilong wanem yumi mas i gat strongpela bel taim ol narapela i subim yumi long putim mani i stap namba 1 long laip?

• Olsem wanem Brian na Gloria i putim gen wok lotu i stap namba 1 long laip bilong ol?

• Dispela vidio i kamapim wanem ol stiatok bilong Baibel?