Long pas aposel Pol i salim i go long Taitus, em i tok olsem ol yangpela man, na Taitus tu i mas wok strong long i “stap gutpela piksa long pasin bilong mekim ol gutpela wok.” (Ta 2:6, 7) Bihain long wankain sapta, em i tok lain bilong Jehova i kamap klin na bai ol i ken “givim bel tru long mekim ol gutpela wok.” (Ta 2:14) Wanpela bilong ol dispela gutpela wok em wok bilong autim tok na skulim ol man long Kingdom Bilong God. Sapos yu wanpela yangpela, yu inap mekim wok long strong bilong yu long mekim wok painia haptaim o painia oltaim?—Pr 20:29.

Sapos yu laik mekim wok painia, stretim ol samting long sindaun bilong yu na bai yu inap mekim dispela wok. (Lu 14:28-30) Olsem, hau bai yu lukautim yu yet long sait bilong skin taim yu mekim wok painia? Olsem wanem yu inap winim aua bilong wok painia? Beten long Jehova na kamapim dispela laik bilong yu long em. (Sg 37:5) Toktok wantaim papamama bilong yu na ol bratasista i mekim wok painia long dispela laik bilong yu. Orait mekim ol samting bilong winim dispela mak yu putim. Jehova bai blesim pasin bilong yu long givim bel long mekim wok bilong em!

LUKIM VIDIO OL YANGPELA I GIVIM BIKNEM LONG JEHOVA, NA BIHAIN BEKIM OL DISPELA ASKIM:

• Wanem ol hevi sampela i winim bilong mekim wok painia? Olsem wanem ol i mekim olsem?

• Olsem wanem ol papamama i ken helpim ol pikinini bilong ol long kamap painia oltaim?

• Bilong wanem em i bikpela samting long i gat sediul bilong mekim wok autim tok?

• Olsem wanem ol bratasista insait long kongrigesen i ken helpim na strongim ol painia?

• Ol bratasista i mekim wok painia i kisim wanem ol blesing?