Taim ol marit bilong ol Kristen i stap gut, dispela i givim ona long Jehova na maritman na maritmeri i stap amamas. (Mk 10:9) Bilong marit i ken stap longpela taim na i gat amamas long en, ol Kristen i mas bihainim gut ol stiatok bilong Baibel long taim ol i makim poroman bilong maritim.

Painim wanpela long prenim long taim yu “no yangpela tumas,” em taim we laik bilong mekim maritpasin i strong na yu no inap long skelim gut ol samting. (1Ko 7:36) Yusim gut ol yia we yu stap singel long strongim pasin pren bilong yu wantaim God na kisim ol pasin Kristen. Sapos yu mekim olsem, long taim yu marit yu inap helpim marit long i stap gut.

Paslain long yu wokim disisen long maritim wanpela man o meri, lusim sampela haptaim long save long “insait bilong [em],” olsem pasin tru bilong em. (1Pi 3:4) Sapos i gat sampela samting i mekim na yu gat tupela tingting, toktok wantaim em. Olsem ol narapela pasin pren, tingim ol samting yu inap mekim bilong helpim marit na i no ol samting yu bai kisim. (Fl 2:3, 4) Sapos yu bihainim ol stiatok bilong Baibel paslain long yu marit, yu bai mekim olsem yet long taim yu marit na dispela bai helpim marit bilong yu long stap amamas.

WATSIM VIDIO REDI LONG MARIT—HAP 3: “SKELIM GUT PE,” NA BIHAIN BEKIM OL DISPELA ASKIM:

• Pasin pren bilong sista na Shane i kirap olsem wanem?

• Sista i luksave long wanem ol samting taim tupela i pren yet i stap?

• Hau na papamama i helpim em? Em i mekim wanem disisen we i soim olsem em i gat savetingting?